ថ្ងៃទី១៦ ខែសីហា ឆ្នាំ២០២៤ នៅបន្ទប់ប្រជុំរដ្ឋាករទឹកស្វយ័តសៀមរាប លោក អ៉ឹង គឹមលាង អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប បានដឹកនាំកិច្ចប្រជុំពិគ្រោះយោបល់ និងស្វែងយល់ជាមួយរដ្ឋាករទឹកស្វយ័តសៀមរាប ពាក់ព័ន្ធនឹងការស្នើសុំកំណត់តំបន់ការពារ និងអភិវឌ្ឍប្រភពទឹកស្ថិតនៅក្នុងអាង នៃបឹងទន្លេសាប សម្រាប់ផ្គត់ផ្គង់ទឹកស្អាតក្នុងក្រុងសៀមរាប និងតំបន់ជុំវិញ ដោយមានការងារចូករួមពីថ្នាក់ដឹកនាំ ក្រុមការងាររបស់រដ្ឋាករទឹកស្វយ័តសៀមរាប ថ្នាក់ ស្រុក និងឃុំមួយចំនួន ដែលជាប់ពាក់ព័ន្ធផងដែរ។ រដ្ឋាករទឹកស្វយ័តសៀមរាប បានពិនិត្យឃើញថាស្ថានភាពទឹកបឹងទន្លេសាបកាន់តែស្រកចុះពីមួយឆ្នាំទៅមួយឆ្នាំ ធ្វើឱ្យប៉ះពាល់ដល់គុណភាពទឹក និងការផ្គត់ផ្គង់ទឹកស្អាតជូនប្រជាពលរដ្ឋនៅខេត្តសៀមរាប ហើយប្រភពទឹកពីបឹងទន្លេសាប អាចប្រឈមនឹងការរីងហួត បណ្តាលឱ្យខ្វះប្រភពទឹកសម្រាប់ផលិត និងផ្គត់ផ្គង់ទឹកស្អាតនាពេលអនាគត។ ដោយមើល ឃើញបញ្ហាប្រឈមទាំងនេះ រដ្ឋាករទឹកស្វយ័តសៀមរាប បានសិក្សាកំណត់តំបន់ការពារ និងអភិវឌ្ឍន៍ប្រភពទឹកពីបឹងទន្លេសាប ក្នុងគោលបំណង៖ ១) ការពារគុណភាពទឹក និងប្រភពទឹកពីសកម្មភាពនានា ២) ធ្វើការអភិវឌ្ឍដោយពង្រីក ប្រវែងប្រឡាយ ក្នុងករណីផ្ទៃបឹងទន្លេសាបរួមតូចហួសចុងប្រឡាយបង្ហូរទឹកបច្ចុប្បន្ន និង ៣) ធ្វើការអភិវឌ្ឍដោយស្តារ បាតប្រភពទឹកពីបឹងទន្លេសាបធ្វើជាអាងស្តុកទឹកនៅរដូវប្រាំង។ រដ្ឋាករទឹកស្វយ័តសៀមរាប បានសិក្សា និងកំណត់ តំបន់ការពារ និងអភិវឌ្ឍន៍ប្រភពទឹកពីបឹងទន្លេសាបដូចខាងក្រោម៖១. កំណត់ផ្ទៃប្រភពទឹកពីបឹងទន្លេសាប (មានព្រៃលិចទឹក)៖ ចំនួន ១.០០៧.១៦៨ ម៉ែត្រការ៉េ ជាតំបន់ការពារ ប្រភពទឹក២. កំណត់ផ្ទៃប្រភពទឹកពីបឹងទន្លេសាប (ចាប់ពីព្រៃលិចទឹកទៅផ្ទៃបឹង)៖ ចំនួន ៦.៨៩៧.៧៦៩ ម៉ែត្រការ៉េ ជាតំបន់ការពារ និងអភិវឌ្ឍន៍ប្រភពទឹក។ ក្នុងករណីនេះ តម្រូវឱ្យធ្វើការស្តារបាតបឹងជម្រៅ ២,៩ម៉ែត្រ នៅនីវ៉ូដក ២ ម៉ែត្រ ធៀបនឹងនីវ៉ូសមុទ្រ ហើយផ្ទៃបឹងនេះអាចស្តុកទឹកបានប្រមាណ ១៦.៤៦២.៩០០ម" ដែលអាចប្រើប្រាស់បានរយៈពេល ៥,៧ខែ សម្រាប់តម្រូវការទឹករហូតដល់ឆ្នាំ២០៣៥ និងបានត្រឹមតែរយៈពេល ៣ខែ សម្រាប់តម្រូវការទឹករហូតដល់ ឆ្នាំ២០៥០ ចំពោះករណីបឹងបច្ចុប្បន្នមានការរីងហួតនៅរដូវប្រាំង។