ថ្ងៃទី១៦ ខែសីហា ឆ្នាំ២០២៤ នៅសាលប្រជុំធំ សាលាខេត្តលោក យុន លីនណេ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តបានអញ្ជេីញចូលរួមពិធីកិច្ចប្រជុំផ្សព្វផ្សាយស្តីពីនីតិវិធីការចូលរួមប្រឡងប្រណាំង «ភូមិ ឃុំ-សង្កាត់មានសុវត្ថិភាព» ក្នុងក្របខណ្ឌលក្ខណសម្បត្តិទី៦ ដោយមានការចូលរួមពីមន្ទីរ អង្គភាពពាក់ព័ន្ធចូលរួមផងដែរ។ លោក អភិបាលរងខេត្ត ការកែទម្រងការងារគ្រប់គ្រងធនធានធម្មជាតិ និងបរិស្ថាន ជាការងារអាទិភាពមួយក្នុងចំណោមការងារអាទិភាពរបស់រាជរដ្ឋាភិបាល ដែលមានក្រសួងបរិស្ថានដឹកនាំអនុវត្ត ដោយការកាត់បន្ថយការបំពុលបរិស្ថាន ការពង្រឹងការគ្រប់គ្រងតំបន់ការពារធម្មជាតិ ការអប់រំផ្សព្វផ្សាយនិងការប្រែប្រួលអាកាសធាតុ ការធ្វើទំនើបកម្មរដ្ឋបាលនិងហិរញ្ញវត្ថុប្រកបដោយចីរភាព និងការលើកម្ពស់ការទូតបៃត។លោក អភិបាលរងខេត្តបានបន្តថាក្រសួងបរិស្ថានបានដាក់ចេញនូវយុទ្ធសាស្ត្រចក្រាវិស័យបរិស្ថានឆ្នាំ២០២៣-២០២៨ គោលបំណងតម្រង់ទិសនិងចង្អុលបង្ហាញការងារអាទិភាព ដើម្បីធានាឱ្យបាននូវចីរភាពបរិស្ថាន និងសុក្រឹតកម្មបរិស្ថានកិច្ចឆ្លើយតបទៅនឹងការប្រែប្រួលអាកាសធាតុ និងលើកកម្ពស់សេដ្ឋកិច្ចបៃតង ដើម្បីសម្រេចឱ្យបានជាប្រទេសអព្យាក្រឹតកាបូន និងមានគម្របព្រៃឈើ ៦០% នៅឆ្នាំ២០៥០។ ទន្ទឹងនេះដែរ ក្រសួងបរិស្ថានក៏បាននឹងកំពុងបន្តអនុវត្តគោលនយោបាយការគ្រប់គ្រងសំរាម សំណល់រឹងទីប្រជុំជនឆ្នាំ២០២០-២០៣០ គោលនយោបាយ «ភូមិ ឃុំ-សង្កាត់មានសុវត្ថិភាព»ក្របខ័ណ្ឌលក្ខណសម្បត្តិទី៦៖មានអនាម័យ សោភ័ណភាពល្អ និងបរិស្ថានល្អ» និងកម្មវិធីវិមជ្ឈការ និងវិសហមជ្ឈការ ដែលក្រសួងបរិស្ថានបានប្រគល់មុខងារវិស័យបរិស្ថានជូនរដ្ឋបាលថ្នាក់ក្រោមជាតិ និងជួយគាំទ្រលើការពង្រឹងសមត្ថភាពធនធានមនុស្ស មធ្យោបាយសម្ភារៈ និងបច្ចេកទេស។ ជាក់ស្តែងកិច្ចប្រជុំផ្សព្វផ្សាយថ្ងៃនេះ គឺពិតជាបានចូលរួមចំណែកយ៉ាងធំធេងក្នុងការអនុវត្តគោលនយោបាយ ភូមិ ឃុំ-សង្កាត់មានសុវត្ថិភាព ក្នុងក្របខ័ណ្ឌលក្ខណសម្បត្តិទី៦ «មានអនាម័យ សោភ័ណភាពល្អ និងបរិស្ថានល្អ» ឱ្យកាន់តែយល់ដឹងបន្ថែមទៀត និងមានការចូលរួមចលនាប្រឡងប្រណាំង «ភូមិ ឃុំ-សង្កាត់មានសុវត្ថិភាព» ក្នុងក្របខ័ណ្ឌលក្ខណសម្បត្តិទី៦ ដើម្បីទទួលបានរង្វាន់ជ័យលាភីតាមគោលការណ៍លើកទឹកចិត្តមេត្រីបរិស្ថាន៕
