ថ្ងៃទី០៥ ខែកញ្ញា ឆ្នាំ២០២៤ លោក សុខ ថុល អភិបាលរង ខេត្ត តំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប បានអញ្ជេីញចូលរួមក្នុងសិក្ខាសាលា ស្តីពីការពង្រឹងបរិយាបន្នពិការភាពក្នុងប្រព័ន្ធជំនួយសង្គម ក្រោមការដឹកនាំ ឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមានការអញ្ចេីញចូលរួមពីអគ្គនាយករង ប្រធាននាយកដ្ឋានសុខុមាលភាពជនពិការ ប្រធានមន្ទីរសង្កមកិច្ច អតីតយុទ្ធជន និងយុវនីតិសម្បទា ខេត្តសៀមរាប អនុប្រធាន តំណាងមន្ទីរ ជុំវិញខេត្តសៀមរាប ខេត្តព្រះវិហារ ខេត្តរតនៈគីរី ព្រមទាំង សមាជិក និងអ្នកពាក់ព័ន្ធ លោក សុខ ថុល អរភិបាលរងខេត្តសៀមរាប បានលើកឡើងថា សិក្ខាសាលាស្តីពីការពង្រឹងបរិយាបន្នពិការភាពក្នុងប្រព័ន្ធជំនួយសង្គម និងសេវាសង្គមនេះ ពិតជាមានសារៈសំខាន់ណាស់ក្នុងការផ្តល់សេវាកម្ម និងគាំទ្រដល់ជនមានពិការភាព គ្រួសារ អាណាព្យាបាល និងពាក់ព័ន្ធនានា នឹងជាសក្ខីភាពបង្ហាញពីការគិតគូរ និងយកចិត្តទុកដាក់ខ្ពស់ ចំពោះបងប្អូនជនមានពិការភាពដែលជាជនងាយរងគ្រោះហើយកំពុងតែត្រូវការចាំបាច់នូវការជួយឧបត្ថម្ភគាំទ្រទាំងជីវភាព ស្មារតី សម្ភារៈ លើកកម្ពស់តួនាទី ផលប្រយោជន៍ និងការ ការពារសិទ្ធិ ពីគ្រប់មជ្ឈដ្ឋាន អង្គការដៃគូអភិវឌ្ឍន៍ សហគមន៍ និងរាជរដ្ឋាភិបាលកម្ពុជាយើង។ គោលដៅដ៏ចម្បងរបស់រាជរដ្ឋាភិបាលកម្ពុជា គឺការកាត់បន្ថយភាពក្រីក្រ ការលើកកម្ពស់កម្រិតជីវភាពរស់នៅ និងគុណភាពជីវិតរបស់ប្រជាជនដែលកំពុងមានកំណើនយ៉ាងឆាប់រហ័ស ។ រាជរដ្ឋាភិបាលកម្ពុជាបានចាត់ទុកថា ភាពក្រីក្រ គឺជាការខាតបង់តម្លៃធនធានសេដ្ឋកិច្ច ដែលមិនត្រឹមតែមិនអាចទទួល យកបានខាងផ្នែកផ្លូវចិត្តប៉ុណ្ណោះទេ ប៉ុន្តែវាអាចបណ្តាលឱ្យមានការបែកខ្ញែក និងអស្ថិរភាព ក្នុងសង្គមថែមទៀត ។ឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា សម្ឃឹមថា សិក្ខាសាលាស្តីពីការពង្រឹងបរិយាបន្នពិការភាពក្នុងប្រព័ន្ធជំនួយសង្គម និងសេវាសង្គម នឹងចូលរួមចំណែកក្នុងការកសាងសមត្ថភាព ប្រសិទ្ធភាព និងវិសាលភាពការងារក្នុងការជំរុញការកំណត់អត្តសញ្ញាណកម្មពិការភាពកាន់តែមានប្រសិទ្ធភាពខ្ពស់ ជនមានពិការភាពគ្រប់រូបត្រូវបានកំណត់អត្តសញ្ញាណ និងបានសម្ភាសន៍ចូលក្នុងប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងពិការភាព គ្រប់ជនមានពិការភាពដោយមិនទុកជនមានពិការភាពណាម្នាក់ចោលឡើយ។ ជាពិសេអ្នកពាក់ព័ន្ធទាំងអស់ នឹងជួយផ្សព្វផ្សាយ និងជំរុញជនមានពិការភាពដែលមាន បណ្ណសមធម៌ ឬនៅក្នុងគ្រួសារដែលមានបណ្ណសមធម៌ទៅធ្វើបច្ចុប្បន្នភាពទិន្នន័យជាមួយកម្មវិធីអត្តសញ្ញាណកម្មគ្រួសារក្រីក្រ នៃក្រសួងផែនការ និងទៅចុះឈ្មោះ ជាមួយកម្មវិធីជាតិជំនួយសង្គមក្នុងកញ្ចប់គ្រួសារ ដើម្បីទទួលបានប្រាក់ឧបត្ថម្ភ និងការបណ្តុះបណ្តាលវិជ្ជាជីវៈសមស្រប ព្រមទាំងជួយជំរុញបរិយាបន្នពិការភាពទៅក្នុងសេវាសង្គម និងកម្មវិធីការងាររបស់ខ្លួន ជាពិសេសជំរុញការអនុវត្តច្បាប់កិច្ចការពារ និងលើកកម្ពស់សិទ្ធិជនពិការ៕