រដ្ឋបាលខេត្តសៀមរាប

Siemreap Administration
ស្វែងរក

ឯកឧត្តម អភិបាលខេត្ត បានស្នើឲ្យវិស័យឯកជនចូលរួមជាមួយអាជ្ញាធរក្នុងការស្តារវិស័យទេសចរណ៍ខេត្តសៀមរាប

កាលពីព្រឹកថ្ងៃទី ០២ ខែ មិថុនា ឆ្នាំ២០២០នេះ ឯកឧត្តម ទៀ សីហា អភិបាល​ នៃគណៈអភិបាលខេត្ត បាន អនុញ្ញាតឲ្យប្រតិភូសមាគមសហគ្រិនវ័យក្មេងកម្ពុជា ដឹកនាំដោយលោក ឡាយ គីមសួរ ប្រធានសមាគមសហគ្រិនវ័យក្មេងកម្ពុជា សាខាខេត្តសៀមរាប ចូលជួបពិភាក្សា ការងារស្តារឡើងវិញ លើវិស័យទេសចរណ៍ ក្នុងពេលដែលនៅលើពិភពលោក បានកំពុងជួបវិបត្តិជម្ងឺកូវិដ១៩ នៅសាលាខេត្តសៀមរាប។មានប្រសាសន៍នោះដែរឯកឧត្តម ទៀ សីហា ក៏បានធ្វើការគាំទ្រនូវគំនិតផ្តួចផ្តើមរបស់សមាគមសហគ្រិនវ័យ ក្មេងកម្ពុជា សាខាខេត្តសៀមរាបដែលបានលើកឡើង ក្នុងគោលបំណងរួមគ្នាស្តារឡើងវិញក្នុងវិស័យទេសចរណ៍ និងបង្កើនការជម្រុញវិស័យ កសិទេសចរណ៍នៅតាមបណ្តាភូមិ ស្រុកក្នុងខេត្តសៀមរាប ។ ឯកឧត្តមបានបន្តថា រាល់គំនិត ដែលសមាគមសហគ្រិនវ័យក្មេងកម្ពុជា លើកឡើងនេះ គឺស្ថិតនៅក្នុងគម្រោងរបស់ខេត្ត ដែលបានដាក់ទៅក្រសួង ក្នុង គោលដៅអភិវឌ្ឍន៍ខេត្ត ។ ម៉្យាងទៀត ក្នុងឱកាសដែលភ្ញៀវកំពុងធ្លាក់ចុះ និង ជួបនូវវិបត្តិកូវីដ១៩ អាជ្ញាធរខេត្ត បាន កំពុងធ្វើការស្តារឡើងវិញ នូវហេដ្ឋរចនាសម្ព័ន្ធផ្លូវថ្នល់ក្នុងក្រុង និង ជនបទ ព្រមទាំងធ្វើការជម្រុញដល់គ្រប់បណ្តាក្រុង ស្រុក ក្នុងការបង្កើតនូវតំបន់ទេសចរណ៍ធម្មជាតិក្នុងសហគមន៍របស់ខ្លួន ដើមី្បលើកកម្ពស់ជីវភាពរបស់ប្រជាពលរដ្ឋ នៅតាមមូលដ្ឋាន ឲ្យកាន់តែប្រសើរឡើងថែមទៀត ។ ក្នុងនោះដែរឯកឧត្តមក៏បានផ្តល់នូវអនុសាសន៍ល្អៗមួយចំនួន ដោយបច្ចុប្បន្ននេះប្រមុខរាជរដ្ឋាភិបាល និង ក្រសួងសុខាភិបាល បានធ្វើការរឹតបន្តឹងក្នុងការអនុវត្តប្រយុទ្ធប្រឆាំងនឹង រលកទី២នៃជម្ងឺកូវិដ១៩ កុំឲ្យមានការរីករាលដាលនៅក្នុងសហគមន៍ ។ ដោយកត្តានេះហើយ អាជ្ញាធរខេត្ត បានកំពុងយកចិត្តទុកដាក់ខ្ពស់ ចំពោះបញ្ហាការប្រមូលផ្តុំរបស់ប្រជាពលរដ្ឋ នៅតាមភោជនីយដ្ឋាន តើគ្រប់ម្ចាស់ភោជនីយដ្ឋានទាំងនោះបានអនុវត្តទៅតាមការណែនាំរបស់ក្រសួងសុខាភិបាល និង ក្រសួងទេសចរណ៍ អំពីគម្លាតសុវត្ថិភាព ក្នុងការការ ពារនូវជម្ងឺកូវិដ១៩នេះ ។ ឯកឧត្តមក៏បានបញ្ជាក់ ពីគម្រោងការជិះកង់ទេសចរណ៍ ដោយអាជ្ញាធរខេត្ត និង អប្សរា បាន បង្កើតផ្លូវសម្រាប់ជឹះកង់ ប្រកបទៅពណ៌បៃតងនៅក្នុងតំបន់ទេសចរណ៍ប្រវត្តិសាស្ត្រសៀមរាប ។ ក្នុងនោះចំពោះរាល់ បញ្ហាដែលសមាគមសហគ្រិនវ័យក្មេងកម្ពុជា បានលើកឡើងទាំងនោះ ឯកឧត្តមនឹងយកទៅធ្វើការពិភាក្សាជាមួយ សាមីក្រសួងពាក់ព័ន្ធផងដែរ ៕

អត្ថបទទាក់ទង