កាលពីរសៀលថ្ងៃសុក្រ ៧រោច ខែជេស្ឋ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី ១២ ខែមិថុនា ឆ្នាំ២០២០ នៅទីស្នាក់ការសាខាកាកបាទក្រហមកម្ពុជា ខេត្តសៀមរាប លោក ស៊ុំ សំអន នាយកសាខា តំណាងឯកឧត្តម ទៀ សីហា ប្រធានគណៈកម្មាធិការសាខា បានជួបសំណេះសំណាល និងទទួលថវិកាអបអរខួបលើកទី១៥៧ ទិវាពិភពលោកកាកបាទក្រហម អឌ្ឍចន្ទក្រហម ឆ្នាំ២០២០ ពីសប្បុរសជន និងមន្ត្រីរាជការមន្ទីរទេសចរណ៍ ខេត្តសៀមរាប ។ ក្នុងឱកាសនោះ លោក ង៉ូវ សេងកាក ប្រធានមន្ទីរទេសចរណ៍ ខេត្តសៀមរាប ក៏ដូចជាសប្បុរសជន បានឱ្យដឹងថា ថវិកាដែលប្រគល់ជូនសាខាកាកបាទក្រហមកម្ពុជា ខេត្តសៀមរាប នាពេលនេះ គឺជាការរួមចំណែកតិចតួចមួយ ជាមួយសកម្មភាពមនុស្សធម៌របស់កាកបាទក្រហមកម្ពុជា ដែលថ្នាក់ដឹកនាំ និងមន្ត្រីរាជការនៃមន្ទីរសុខាភិបាល ខេត្តសៀមរាប ព្រមទាំងក្រុមគ្រួសារនៃសប្បុរសជន បានបរិច្ចាគដោយសទ្ធាជ្រះថ្លា ហើយនេះក៏ជាវប្បធម៌នៃការចែករំលែកជួយគ្នា ទោះតិចក្ដីច្រើនក្ដី តែជាទឹកចិត្តជួយគ្នាក្នុងគ្រាក្រ គ្រាលំបាក ។ ក្នុងឱកាសនោះដែរលោក ស៊ុំ សំអន នាយកសាខាកាកបាទក្រហមកម្ពុជា ខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសធម៌របស់ ថ្នាក់ដឹកនាំ មន្ត្រីរាជការមន្ទីរទេសចរណ៍ ខេត្តសៀមរាប និងសប្បុរសជនទាំង ដែលបានយកចិត្តទុកដាក់ចូលរួមចំណែកក្នុងសកម្មភាពមនុស្សធម៌ គឺសបញ្ជាក់ពីទឹកចិត្តដ៏ប្បុរសធម៌ចំពោះបងប្អូនប្រជាពលរដ្ឋរងគ្រោះ និងងាយរងគ្រោះបំផុត។ ក្នុងកាយវិកាដ៏មនុស្សធម៌នេះ គឺជាការចូលរួមរបស់សប្បុរសជនជាមួយសកម្មភាពមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។ សាខាកាកបាទក្រហមកម្ពុជា ខេត្តសៀមរាប នឹងប្រើប្រាស់នូវថវិកានេះ ឱ្យចំគោលដៅមនុស្សធម៌ ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាអន្តរជាតិកាកបាទក្រហម អឌ្ឍចន្ទក្រហម។ លោកក៏សូមជូនពរដល់ ថ្នាក់ដឹកនាំ មន្ត្រីរាជការមន្ទីរទេសចរណ៍ ខេត្តសៀមរាប និងសប្បុរសជនទាំងអស់ សូមបានជួបប្រទះនូវពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ថវិកាដែលបានទទួលមាន៖- មន្ទីរទេសចរណ៍ ខេត្តសៀមរាប ថវិកាចំនួន ២,៥០០,០០០(ពីរលានប្រាំសែន)រៀល។- លោក ហួរ សៀកផេង អគ្គនាយក Angkor Market Group Co., Ltd ថវិកាចំនួន ៥,០០០(ប្រាំពាន់)ដុល្លារអាមេរិក។- ឧកញ៉ា ទូច សៀ នាយកក្រុមហ៊ុនវិនិយោគចំណតរថយន្ត ក្រុងសៀមរាប ថវិកាចំនួន ៥,០០០(ប្រាំពាន់)ដុល្លារអាមេរិក។- លោកជំទាវ ស៊ិន ពិសី សមាជិកាគណៈកម្មាធិការសាខាកាកបាទក្រហមកម្ពុជា ខេត្តសៀមរាប ថវិកាចំនួន ១,០០០(មួយពាន់)ដុល្លារអាមេរិក។- ធនាគារអេស៊ីលីដា សាខាក្រុងសៀមរាប ថវិកាចំនួន ២០០,០០០(ពីរសែន)រៀល៕
