ថ្ងៃអង្គារ ១៤រោច ខែអាសាឍ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី ១៤ ខែកក្កដា ឆ្នាំ២០២០ រដ្ឋបាលសាលាខេត្ត បានរៀបចំកិច្ចប្រជុំពិភាក្សាលើតួនាទីភារកិច្ចរបស់ក្រុមប្រឹក្សាកិច្ចការវត្តអារាម ក្នុងខេត្តសៀមរាប ដឹកនាំដោយ លោកស្រី យូ សុភា អភិបាលរងខេត្តសៀមរាប ព្រមទាំងមានការនិមន្តចូលរួម ពីព្រះមេគណខេត្តទាំងពីរគណៈ អនុគណក្រុង ស្រុក ទាំង៥ នាយករដ្ឋបាលសាលាខេត្ត នាយកទីចាត់ការអន្តរវិស័យ មន្ទីរធម្មការ និងសាសនា និងមន្រ្តីជំនាញនៃរដ្ឋបាលសាលាខេត្តផងដែរ។ កិច្ចប្រជុំបានពិភាក្សាលើបញ្ហាមួយចំនួន ពាក់ព័ន្ធនឹងការអនុវត្តសកម្មភាពក្នុងការទប់ស្កាត់ការរុះរើសសំណង់បុរាណ ពិសេសព្រះវិហារ ឬអគារសំណង់ដែលមានអាយុកាល៥០ឆ្នាំ និងការសាងសង់អគារថ្មីនៅតាមទីវត្តអារាមក្នុងខេត្តសៀមរាប ពិសេសវត្តដែលស្ថិតនៅក្នុងតំបន់ប្រវត្តិសាស្រ្ត ដែលសំបូរទៅដោយប្រាង្គប្រាសាទបូរាណ ដែលទាមទារឲ្យមានការចូលរួមថែរក្សា និងអភិរក្ស។ ពាក់ព័ន្ធនឹងការសាងសង់សំណង់នៅក្នុងទីធ្លាវត្តអារាម ត្រូវមានការត្រួតពិនិត្យអំពីបច្ចេកទេសឲ្យបានច្បាស់លាស់និងត្រឹមត្រូវពីអ្នកជំនាញ ហើយត្រូវបានអនុញ្ញតដោយអាជ្ញាធរមានសមត្ថកិច្ច ជៀសវាងមានបញ្ហាឬគ្រោះថ្នាក់ណាមួយជាយថាហេតុ ជាពិសេសត្រូវគោរពច្បាប់ជាធរមាន។ ដើម្បីរក្សាបាននូវការគោរពនិងប្រតិបត្តិរបស់ពុទ្ធបរិសទ គ្រប់វត្តអារាមទាំងអស់ត្រូវពិនិត្យលើបញ្ហាដើររៃអង្គាស ឬនិមន្តបិណ្ឌបាតបច្ច័យ នៅតាមទីសាធារណៈ ដោយយើងពុំបានដឹងថាតើនៅក្នុងរូបភាពយកទៅធ្វើអ្វីខ្លះ ដែលធ្វើឲ្យប៉ះពាល់ដល់វិស័យព្រះពុទ្ធសាសនា។ ទន្ទឹមនឹងនេះ ក៏បានធ្វើការផ្សព្វផ្សាយ អប់រំ ណែនាំដល់ព្រះសង្ឃ និងសាធារណជន កុំឱ្យមានការចូលកាន់កាប់រាន ដុត ឈូសឆាយ ទន្រ្ទាន និងហ៊ុមព័ទ្ធដីតំបន់សហគមន៍ព្រៃឈើ ដីគម្រប់ព្រៃឈើ ដីតំបន់ព្រៃលិចទឹក និងដីតំបន់ការពារធនធានធម្មជាតិ ឬតំបន់ការពារ អភិរក្ស នៅក្នុងភូមិសាស្ត្រខេត្តសៀមរាប ពង្រីកធ្វើជាវត្តអារាម និងជៀសវាងការរុករានទន្ទ្រានដីរដ្ឋគ្រប់ប្រភេទ ដើម្បីវាតយកដីធ្វើជាកម្មសិទ្ធសម្រាប់បង្កើត ឬធ្វើជាអាស្រមថ្មីខុសច្បាប់៕