នារសៀលថ្ងៃទី១៤ ខែកក្កដា ឆ្នាំ២០២០ លោក លី សំរិទ្ធ អភិបាលរងខេត្តទទួលបន្ទុកគម្រោងថ្នាក់ខេត្តបានដឹកនាំក្រុមការងារចុះពិនិត្យការបង្រៀនការចិញ្ចឹមមាន់ដល់បងប្អូនប្រជាពលរដ្ឋ និងក្រុមសន្សំនៅឃុំជីក្រែង និងឃុំអន្លង់សំណរ ស្រុកជីក្រែង ដើម្បីស្វែងរកចំណុចខ្លាំងនិងចំណុចខ្វះខាតដែលបានអនុវត្តកន្លងមក។ជាមួយគ្នានេះ លោក បានកោតសរសើរចំពោះបងប្អូនប្រជាពលរដ្ឋទាំងពីរឃុំ ដែលបានយកបទពិសោធន៍ពីវគ្គបណ្តុះបណ្តាលនេះយកទៅអនុវត្តដោយចិញ្ចឹមមាន់ ទទួលបានលទ្ធផលយ៉ាងល្អប្រសើរ។ ម្យ៉ាងទៀត ចំពោះក្រុមសន្សំឃើញថាមានភាពល្អប្រសើរផងដែរ ដោយក្រុមនីមួយៗបានយកចិត្តទុកដាក់និងអនុវត្តទៅតាមបទបញ្ជាផ្ទៃក្នុងរបស់ក្រុម និងការណែនាំរបស់ក្រុមការងារគម្រោងកន្លងមក។ ទន្ទឹមនឹងលទ្ធផលទាំងនេះ ក្រុមការងារក៏បានរកឃើញនូវចំណុចខ្វះខាតមួយចំនួន ហើយលោក ក៏បានណែនាំដល់មន្ត្រីពាក់ព័ន្ធត្រូវបន្តបង្រៀននិងណែនាំដល់គាត់បន្ថែមទៀតនូវចំណុចខ្វះខាតទាំងនេះ។ឆ្លៀតក្នុងឱកាសនេះ លោក និងក្រុមការងារក៏បានចុះពិនិត្យការចិញ្ចឹមសត្វ ពិនិត្យក្រុមសន្សំរបស់ប្រជាពលរដ្ឋដែលជាសមាជិកក្រុមសន្សំរបស់គម្រោងលាភ ជាមួយគ្នានេះ លោកក៏បានចុះពិនិត្យផ្លូវមួយខ្សែដែលកំពុងសាងសង់ដោយគម្រោងលាភស្ថិតក្នុងឃុំអន្លង់ ស្រុកជីក្រែង៕