នៅព្រឹក ថ្ងៃសៅរ៍ ៥កើត ខែស្រាពណ៍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៥ ខែកក្កដា ឆ្នាំ២០២០ ពិធីតាំងបង្ហាញលក់ផលិត​ផលបន្លែ របស់បណ្តា​សហ​គមន៍​ នៅផ្សារសុវត្ថិភាពចុងសប្តាហ៍ ខេត្តសៀមរាប​ ក្រោមអធិបតីភាព លោក នាក់ ណេរ៉ុន អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈ​អភិបាល​ខេត្តសៀរាប និងមានការអញ្ជើញចូលរួមពី លោកប្រធានមន្ទីរពាណិជ្ជកម្មខេត្ត លោកប្រធានមន្ទីរកសិកម្មខេត្ត លោកឧកញ្ញាបណ្ឌិតប្រធានសភាពាណិជ្ជកម្មខេត្ត គម្រោងអេមស៍​ គម្រោងលាភ គម្រោង ASPIRE លោក​ លោកស្រី​ មន្ទីរអង្គភាពពាក់ព័ន្ធនិងអង្គការដៃគូរនានា។ ពិធីតាំងបង្ហាញនេះ ក្នុងគោលបំណងដើម្បីជួយជម្រុញទីផ្សារបន្លែសុវត្ថិភាពរបស់សហគមន៍នៅតាមបណ្តាស្រុក​-ក្រុង​ ក្នុងខេត្តសៀមរាបនេះឲ្យកាន់តែមានភាពល្អប្រសើរថែមទៀត​ និងជំរុញការគាំទ្រផលិតផលបន្លែរបស់កសិករខ្មែរ ឲ្យមានទីផ្សារ និងបង្កើនប្រាក់ចំណូលរបស់សហគមន៍ និងប្រជាពលរដ្ឋនៅមូលដ្ឋានផ្ទាល់​ ហើយជាពិសេសមានការពេញចិត្តពីប្រជាពលរដ្ឋក្នុងការប្រើប្រាស់​ និងបរិភោគ ដែលអាចកាត់បន្ថយការនាំចូលបន្លែផងដែរ។ បច្ចុប្បន្នមន្ទីរពាណិជ្ជកម្មខេត្តសៀមរាប ជាខេត្តតភ្ជាប់នៃមណ្ឌលភូមិភាគពាយព្យ នៃគម្រោងអេមស៍ (AIMS) កំពុងជំរុញការផ្សារភ្ជាប់ក្រុមកសិករទៅនឹងទីផ្សារ ដែលបានអនុវត្តន៍លើផលិតផលមាន់ស្រែ និងបន្លែ ដែលមានសហគមន៍បន្លែសុវត្ថិភាពចូលរួមមកពីស្រុកចំនួន៧ គឺស្រុកជីក្រែង​ ស្រុកស្វាយលើ ស្រុកបន្ទាយស្រី ស្រុកសូទ្រនិគម ស្រុកប្រាសាទបាគង​ ស្រុកពួក និងក្រុងសៀមរាប ដោយបានសហការជាមួយមន្ទីរកសិកម្មខេត្ត សភាពាណិជ្ជកម្ម គម្រោងលាភ គម្រោង ASPIRE និងដៃគូរផ្សេងៗទៀត។ ជាមួយគ្នានេះ ប្រជា​កសិករ បានលើកឡើងអំពីការដាំបន្លែធម្មជាតិនេះ ដោយគ្រាន់តែប្រើជីធ្វើពីធម្មជាតិ ដែលគេហៅថា ជីកំប៉ុស្តិ៍ធ្វើពីរុក្ខជាតិតូចៗ និងអាចម៌គោ អាចម៏មាន់ ដោយពួកគាត់មិនបានប្រើប្រាស់ជីសារធាតុគីមីឡើយ។ ហើយការលក់បន្លែសុវត្ថិភាពរបស់សគមន៍នេះ បើកលក់បាន២ថ្ងៃក្នុងមួយសប្តាហ៍ គឺយើងលក់នៅថ្ងៃសៅរិ៍ និងថ្ងៃអាទិត្យ ដោយលក់ចាប់ពីម៉ោង ៧:០០នាទី រហូតដល់ម៉ោង ១១:០០នាទីថ្ងៃត្រង់ ក្រៅពីនោះគឺពួកគាត់លក់នៅតាមផ្សារនានាក្នុងខេត្ត​សៀមរាបផងដែរ។ គម្រោងជំរុញទីផ្សារសម្រាប់កសិកម្មខ្នាតតូច (AIMS) គឺជាគម្រោងរួមគ្នារវាង រាជរដ្ឋាភិបាលកម្ពុជា និងមូលនិធិអន្តរជាតិសម្រាប់អភិវឌ្ឍន៍កសិកម្ម ដែលហៅថា (IFAD)។ គម្រោងនេះមានរយៈពេលប្រាំមួយឆ្នាំ និងមានប្រសិទ្ធភាពអនុវត្តចាប់ពី ឆ្នាំ២០១៧ ហើយរំពឹងថានឹងបញ្ចប់គម្រោងនៅឆ្នាំ២០២៣។ គម្រោងនេះសហការអនុវត្តដោយ ក្រសួងពាណិជ្ជកម្ម និង ក្រសួងសេដ្ឋកិច្ច និងហិរញ្ញវត្ថុ រួមជាមួយនឹងដៃគូអនុវត្តន៍ផ្សេងទៀត។ពិធីនេះបានប្រព្រឹត្តទៅនាព្រឹក ថ្ងៃសៅរ៍ ៥កើត ខែស្រាពណ៍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៥ ខែកក្កដា ឆ្នាំ២០២០ នៅផ្សារសុវត្ថិភាពចុងសប្តាហ៍ ជិតព្រះរាជដំណាក់ មាត់ស្ទឹងសៀមរាប ក្រុងសៀមរាប ខេត្តសៀមរាប។