ព្រឹកថ្ងៃអង្គារ ៦កើត ខែមិគសិរ ឆ្នាំខាល ចត្វាស័ក ព.ស.២៥៦៦ខេត្តសៀមរាប ថ្ងៃទី​២​៩ ខែ​វិច្ឆិកា ឆ្នាំ២០២២ នៅក្នុងសាលប្រជុំរបស់សណ្ឋាគារ អ៊ីមព្រេស វេលា​ម៉ោង៨ និង០០​នាទី លោកស្រី ម៉ននី រង្សី អភិបាលរងខេត្ត តំណាង​​​ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បាន​អញ្ជើញ​ចូលរួមក្នុងកម្មពិធីសិក្ខាសាលាសម្ពោធដាក់ឱ្យដំណើរការអនុវត្តសាកល្បង «មណ្ឌលស្រឡាញ់ទារក» ក្រោមអធិបតីភាពលោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល ដោយមានការអញ្ជើញចូលរួមពីលោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលនៃរដ្ឋបាលខេត្ត លោក ឡេង វីរៈ នាយកប្រតិបត្តិអង្គការទស្សនៈពិភពលោក លោក លោកស្រី មន្រ្តីរាជការ លោក/លោកស្រី អភិបាល/អភិបាលរងស្រុកពួក អង្គរជុំ និងស្រុក វ៉ារិន។លោកស្រីអភិបាលរងខេត្ត បានលើកឡើងថា តាមរយៈនៃការដាក់ឱ្យអនុវត្តសាកល្បងនូវ «មណ្ឌលសុខភាពស្រឡាញ់កុមារ» នៅមណ្ឌលសុខ ភាពទាំង ៨មណ្ឌល នៃការិយាល័យស្រុកប្រតិបត្តិស្រុកអង្គរជុំ នាពេលនេះ គឺពិតជាមានសារៈសំខាន់ ខ្លាំងណាស់ ក្នុងការកាត់បន្ថយភាពស្គមស្គាំងរបស់កុមារ។ លោកស្រីអភិបាលរងសង្ឃឹមថា ក្រសួងសុខាភិបាល ក៏ដូច អង្គការទស្សនៈ​ពិភព​លោក​ នឹងពង្រីកដល់គ្រប់គោលដៅទាំងអស់ក្នុងភូមិសាស្រ្តខេត្តសៀមរាប នាពេល ដ៏ខ្លីខាងមុខនេះ។ លោកស្រីបានបន្ថែមផងដែលថាបច្ចុប្បន្ន ស្ថានភាព​ប្រទេសកម្ពុជា បានវិវត្តន៍ទៅរកប្រក្រត្រីភាពឡើងវិញ ការឆ្លង​រីករាលដាល​នៃជំងឺ​កូវីដ-១៩ ត្រូវបានប្រមុខរាជរដ្ឋាភិបាលកម្ពុជា ដែលមាន​សម្តេចតេជោ ហ៊ុន សែន ជានាយករដ្ឋមន្ត្រី ដឹកនាំចាត់​វិធានការ​គ្រប់គ្រងបានយ៉ាងមានប្រសិទ្ធភាព និងទទួលបានលទ្ធផលជោគជ័យគួរជាទីមោទនភាពក្រៃលែង ក្នុងការបង្ការ ទប់ស្កាត់ និងជួយសង្គ្រោះអាយុជីវិតប្រជាជនកម្ពុជាបានស្ទើរតែទាំងស្រុង ពីគ្រោះ មហន្តរាយដល់អាយុជីវិត នៃការឆ្លងរាតត្បាតជំងឺកូវីដ-១៩ ក្រោមគោលនយោបាយ ចាក់ស្រោចវ៉ាក់សាំងដល់ប្រជាជនកម្ពុជា ១០០% និងបន្តចាក់ដូសជំរុញជាបន្តបន្ទាប់រហូតដល់ពេលនេះ។ ភាពជោគជ័យ នេះមិនត្រឹមតែអាចជួយសង្គ្រោះជីវិតប្រជាជន ពីការស្លាប់ប៉ុណ្ណោះទេ តែក៏ជាការផ្តល់ឱកាសដ៏មានតម្លៃដល់រាជរដ្ឋាភិបាល ក៏ដូចជាប្រជាជន គ្រប់រូបក្នុងការវិលត្រឡប់មករកប្រក្រតីភាព នៃជីវភាពសង្គម សេដ្ឋកិច្ច និងបើកដំណើរការប្រទេសតាមគន្លងប្រក្រតីភាពថ្មីឡើងវិញផងដែរ។ ទន្ទឹមគ្នាទៅនឹងភាពរីកចម្រើនផ្នែកសេដ្ឋកិច្ច និងសង្គមកិច្ច សម្រាប់ក្របខណ្ឌខេត្តសៀមរាប ពិតជាបានជួបប្រទះនូវភាពប្រឈម មួយចំនួនលើអាហារូបត្ថម្ភ ដូចជាការអនុវត្តការបំបៅកូនដោយទឹកដោះម្តាយ។ មានហេតុផលជាច្រើន ដែលបណ្តាលឱ្យយើងជួបប្រទះនូវបញ្ហា ការអនុវត្តការបំបៅដោយទឹកដោះម្តាយ រួមមាន៖ ការធ្វើចំណាកស្រុកដើម្បីស្វែងរកឱកាសការងារ កង្វះខាតចំណេះដឹងអំពីការបំបៅកូនដោយទឹកដោះម្តាយ ទំនៀមទម្លាប់ វប្បធម៌ ការខ្វះខាតការគាំទ្រពីសមាជិកគ្រួសារ និងការរីករាលដាល នៃការផ្សព្វផ្សាយលក់ផលិតផលជំនួសទឹកដោះម្តាយ (ទឹកដោះគោម្សៅផ្សំតាមរូបមន្ត)៕