![](https://asset.cambodia.gov.kh/provincial/sites/22/2023/08/366299635_637416368532693_8835032901921057203_n-1024x683.jpg)
លោកស្រី ម៉ននី រង្សី បានបញ្ជាក់ថាខេត្តសៀមរាប ជាខេត្តប៉ូលទេសចរណ៍មួយដ៏សំខាន់របស់ព្រះរាជាណាចក្រកម្ពុជា ដែលមានប្រាសាទអង្គរវត្តជាសម្បត្តិបេតិកភណ្ឌពិភពលោក បន្ទាប់ពីស្ថានភាពជំងឺកូវីដ-១៩ មានភាពធូរស្រាលតាមរយៈការចាក់វ៉ាក់សាំងក្រោមការដឹកនាំដ៏ឈ្លាសវៃរបស់ សម្ដេចតេជោ នាយករដ្ឋមន្ត្រី បានសម្រេចបើកដំណើរការប្រទេសឡើងវិញ បានធ្វើឱ្យវិស័យទេសចរណ៍នៅខេត្តសៀមរាបមានការកើនឡើង ដោយមានភ្ញៀវទេសចរជាតិ-អន្តរជាតិ ចូលមកកំសាន្ត និងទស្សនាប្រាង្គប្រសាទក្នុងខែកក្កដាសរុបចំនួន ១៤៥,៦១០នាក់។ លការសម្រេចបានលទ្ធផលទេសចរណ៍ប្រកបដោយក្តីសង្ឃឹមនេះ បានឆ្លុះបញ្ចាំងដោយកត្តារួមផ្សំជាច្រើន រួមមាន ៖ ទី១-សុខសន្តិភាព ក្រោមការដឹកនាំដ៏ឈ្លាសវៃរបស់ សម្តេចតេជោ នាយករដ្ឋមន្ត្រី ដែលរក្សាបាននូវសុខសន្តិភាព ស្ថេរភាព និងសណ្ដាប់ធ្នាប់សង្គម។ ទី២-ការគ្រប់គ្រងការរីករាលដាលជំងឺកូវីដ-១៩ ក្នុងសង្គមបានល្អ រហូតឈានដល់មានការទទួលស្គាល់កម្ពុជាជាប្រទេសជាប់ចំណាត់ ថ្នាក់លេខ១ នៅលើពិភពលោក (ក្នុងចំណោម ១៦៦ប្រទេស) ដែលបានធ្វើឱ្យកម្ពុជា ក៏ដូចជាខេត្តសៀមរាប យើងកា្លយជាគោលដៅសុវត្ថិភាពសម្រាប់ទទួលទេសចរជាតិ-អន្តរជាតិ។ ទី៣-ការត្រៀមលក្ខណៈសម្បត្តិ ន ឧស្សាហកម្មទេសចរណ៍ នៅក្នុងខេត្តសៀមរាបយើង ដែលផ្តោតសំខាន់ទៅលើការពង្រឹងគោលដៅទេសចរណ៍ និងឧស្សាហកម្មទេសចរណ៍ក្នុងការត្រៀមទទួលទេសចរឡើងវិញតាមរយៈការអនុវត្តបានជោគជ័យតាម វិធានការសុខាភិបាល, បទប្បញ្ញត្តិ, វិធានការរដ្ឋបាល និងជាពិសេសការដាក់ចេញឱ្យអនុវត្តវិធានសុវត្ថិភាព ទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) តាមគន្លងប្រក្រតីភាពថ្មីសម្រាប់សេវាកម្មទេសចរណ៍។
លោកស្រី ក៏បានបន្ថែមថា រដ្ឋបាលខេត្តសៀមរាបបានទទួលគម្រោងស្ដារ ស្ទឹងសៀមរាបជំហានទី២ ដែលមានប្រវែង ៤,៦គីឡូម៉ែត្រ ដោយផ្តោតលើការស្តារ និងការរៀបចំសោភ័ណ្ឌភាព ស្ទឹង និងដើម្បីបញ្ចៀសទឹកលិចក្រុងសៀមរាប ក្រៅពីនេះរដ្ឋបាលខេត្ត ក៏បានធ្វើការស្តារ និងសាងសង់បណ្ដាញ លូទឹកភ្លៀង លូទឹកកខ្វក់ ការរៀបចំចំណតនៅតាមដងផ្លូវជាតិលេខ៦ ការបំពាក់កាមេរ៉ាសុវត្ថិភាព ភ្លើងសញ្ញ ចរាចរណ៍ និងបំពាក់អំពូលបំភ្លឺសាធារណៈសន្សំសំចៃថាមពល(LED) និងភ្ជាប់ដោយប្រព័ន្ធបញ្ជាស្វ័យប្រវត្តិ ដែលធ្វើឱ្យតាមដងផ្លូវសំខាន់ៗក្នុងក្រុងសៀមរាបត្រូវបានបំភ្លឺនៅពេលរាត្រី៕