ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានបញ្ជាក់ថា ការបោះឆ្នោតជ្រើសរើសប្រធាន-អនុប្រធាន ការិយាល័យប្រជាពលរដ្ឋនាពេលនេះ គឺបានរៀបចំធ្វើកិច្ចប្រជុំជាច្រើនរួចមកហើយ តាមរយៈកិច្ចប្រជុំផ្សព្វផ្សាយអំពីការជ្រើសរើសតំណាងអង្គការសង្គមស៊ីវិលជាតិ ដោយក្នុងនោះ មានអង្គការសង្គមស៊ីវិលជាតិ ចូលរួមជាគណៈកម្មការបោះឆ្នោតជ្រើសរើសប្រធាន អនុប្រធានការិយាល័យប្រជាពលរដ្ឋផងដែរ ដោយស្របតាមសេចក្តីណែនាំ លេខ ០២៤សណន របស់ក្រសួងមហាផ្ទៃផងដែរ ។ ជាមួយគ្នានោះដែរ ឯកឧត្តម ប្រធានក្រុមប្រឹក្សាខេត្ត បានបញ្ជាក់បន្ថែមថា កាជ្រើសរើស ប្រធាន-អនុប្រធាន ការិយាល័យប្រជាពលរដ្ឋ គឺជាការងារស្នូលរបស់ការិយាល័យ គឺដើរតួយ៉ាងសំខាន់ ក្នុងការទទួលពាក្យបណ្ដឹង សម្របសម្រួលដោះស្រាយបណ្ដឹងក្រៅប្រព័ន្ធ តុលាការ ដែលពាក់ព័ន្ធទៅ នឹងការផ្ដល់សេវាសាធារណៈជូនប្រជាពលរដ្ឋ ក៏ដូចជាការគ្រប់គ្រងរដ្ឋបាលថ្នាក់ក្រោមជាតិ។
ឯកឧត្តម អ៊ាន ឃុន ក៏បានផ្ដាំផ្ញើដល់ សមាជិកគណៈកម្មការ នៃការរៀបចំការបោះឆ្នោតជ្រើសរើសការិយាល័យប្រជាពលរដ្ឋ នាពេលនេះ សូមធ្វើឡើងដោយសុក្រឹត្យ ច្បាស់លាស់ និងយុត្តិធម៌ ឲ្យស្របទៅនឹងការសម្រេចចិត្តរបស់ ឯកឧត្តម លោកជំទាវ លោក លោកស្រី ដែលបានបោះឆ្នោតជូនទៅដល់បុគ្គលដែលមានសមត្ថភាពគ្រប់គ្រាន់ ដើម្បីបំពេញតួនាទីរបស់ខ្លួនឲ្យមានប្រសិទ្ធភាពខ្ពស់ ។
បេក្ខជនឈរឈ្មោះជាប្រធាន មានចំនួន៣រូប ក្នុងនោះមាន៖ ១. លោក ទីវ សារ៉ូន. ២ លោក នេត ផល្គុន និង៣. លោក សៅ សាវុធ ចំណែកបេក្ខជនឈរឈ្មោះជាអនុប្រធាន មានចំនួន៤រូប រួមមាន៖ ១. លោក ទីវ សារ៉ូន , ២ លោក សៅ សាវុធ ,៣. លោកស្រី ស៊ឹម សុវណ្ណារី និង៤. លោក ស៊ុម ស៊ីណា ។ ក្រោយការបោះឆ្នោត លោក នេត ផល្គុន បានជាប់ឆ្នោតជាប្រធាន ការិយាល័យប្រជាពលរដ្ឋខេត្តសៀមរាប និង លោកស្រី ស៊ឹម សុវណ្ណារី ជាអនុប្រធាន ការិយាល័យប្រជាពលរដ្ឋខេត្ត ។ ក្រោយការបោះឆ្នោត និងប្រកាសលទ្ធផល ឯកឧត្តម អ៊ាន ឃុន បានណែនាំ ឲ្យក្រុមលេខាធិការដ្ឋានក្រុមប្រឹក្សាខេត្ត រៀបចំធ្វើលិខិតស្នើសុំទៅក្រសួងមហាផ្ទៃ ដើម្បីឲ្យមានការប្រកាសជាផ្លូវការទៅតាមនីតិវិធីនៃច្បាប់ ៕