ឯកឧត្តម Nguyen Thanh Van បានថ្លែងអំណរគុណយ៉ាងជ្រាលជ្រៅចំពោះឯកឧត្តម ប្រាក់ សោភ័ណ អភិបាលខេត្តដែលចំណាយពេលដ៏មានតម្លៃ ដែលអនុញ្ញាតឱ្យប្រតិភូចូលរួមជួបសំណេះសំណាល និងសម្តែងការគួរសមនាពេលនេះ។ ឆ្លៀតក្នុងឱកាសនេះ ឯកឧត្តម ក៏បានជូនពរដល់ឯកឧត្តម អភិបាលខេត្ត និងលោកជំទាវ ព្រមទាំងក្រុមគ្រួសារមានសិរីសួស្តី ជ័យមង្គល វិបុលសុខ បវរមហាប្រសើរ និងម្លាំងពលំ ដេីម្បីបន្តដឹកនាំអភិវឌ្ឍន៍ខេត្តសៀមរាបឱ្យកាន់តែប្រសេីរឡេីងថែមទៀត។
ឯកឧត្តម អភិបាលខេត្ត ក៏បានស្វាគមន៍យ៉ាងកក់ក្តៅ ចំពោះវត្តមានឯកឧត្តម អគ្គកុងស៊ុល ដែលបានអញ្ជើញមកបំពេញបេសកកម្មក្នុងខេត្តសៀមរាប និងសូមថ្លែងអំណរគុណចំពោះរដ្ឋាភិបាលវៀត ណាម ដែលជានិច្ចកាលតែងតែរក្សានូវទំនាក់ទំនងជាមិត្តល្អជាមួយប្រទេសកម្ពុជា។ ឯកឧត្តម ក៏បានជូនពរដល់ឯកឧត្តម ប្រធានប្រតិភូ និងសហការីក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំរោង ឆស័ក ព.ស ២៥៦៧ ឈានចូល ព.ស.២៥៦៨ សូមមានសុខភាពល្អបរិបូរណ៍ កម្លាំងពលំមាំមួន និងសូមជួបប្រទះតែពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លាងឃ្លាតឡេីយ៕