រដ្ឋបាលខេត្តសៀមរាប

Siemreap Administration

រដ្ឋបាលខេត្តសៀមរាប

Siemreap Administration

ព្រះរាជាណាចក្រកម្ពុជា
ជាតិ សាសនា ព្រះមហាក្សត្រ

កិច្ចប្រជុំ​ ស្ដីពី​ការជំរុញ​ការទប់ស្កាត់​ការកាប់​រានទន្ទ្រានវាតយកដីរដ្ឋដោយខុសច្បាប់​នៅក្នុងតំបន់ការពារធម្មជាតិក្នុងខេត្តសៀមរាប

ដោយ អ៊ុក ពិស្តារចំនួនទស្សនា (124)

ថ្ងៃ​ព្រហស្បតិ៍​ ១១រោច​ ខែអាសាឍ​ ឆ្នាំជូត​ ទោស័ក​ ព.ស២៥៦៤​ ត្រូវនឹងថ្ងៃទី​១៦​ ខែកក្កដា​ ឆ្នាំ​២០២០​ នៅបន្ទប់ប្រជុំ​លេខ​ ០១​ រដ្ឋបាលខេត្តសៀមរាប​ មានបេីកកិច្ចប្រជុំ​ ស្ដីពី​ការជំរុញ​ការទប់ស្កាត់​ការកាប់រានទន្ទ្រានវាតយកដីរដ្ឋដោយខុសច្បាប់​នៅក្នុងតំបន់ការពារធម្មជាតិក្នុងខេត្តសៀមរាប​ ដឹកនាំដោយ​ លោក​ ង៉ាន់​ ភិរុណ​ អភិបាល​រងខេត្ត​ និងជាប្រធានក្រុមទី៤​ នៃក្រុម​ការងារតាមដាន​ និងទប់ស្កាត់ការរុករានទន្ទ្រានដីរដ្ឋគ្រប់ប្រភេទ​ ដេីម្បីវាតយកដីធ្វេីជាកម្មសិទ្ធក្នុងភូមិសាស្ដ្រខេត្តសៀមរាប​ និងមានការចូលរួមពី​ លោកនាយក​រងរដ្ឋបាល​ លោកប្រធាន​មន្ទីរ​ អភិបាល​ស្រុក​ និងអ្នកពាក់ព័ន្ធ​ សរុបចំនួន​ ៤០នាក់។ ដោយផ្អែកតាមលទ្ធផល​ នៃកិច្ចប្រជុំ​ គណៈរដ្ឋមន្ត្រី​កាលពីថ្ងៃទី​០៣​ ខែកក្កដា​ ឆ្នាំ​២០២០​ សម្ដេច​អគ្គមហាសេនា​បតីតេជោ​ ហ៊ុន​ សែន​ នាយក​រដ្ឋមន្ត្រី​ នៃ​ព្រះរាជាណាចក្រ​កម្ពុជា​ បានផ្ដល់អនុសាសន៍ណែនាំដ៏ខ្ពង់ខ្ពស់​ឲ្យរដ្ឋមន្ត្រីក្រសួងបរិស្ថាន​ ក្រសួង​កសិកម្ម​ រុក្ខាប្រមាញ់​ និងនេសាទ​ ក្រសួងរៀបចំដែនដី​ នគរូបនីយកម្ម​ និងសំណង់​ និងរដ្ឋបាលថ្នាក់ក្រោមជាតិ​ ត្រូវកាត់ឆ្វៀលដី​ និងផ្ដល់កម្មសិទ្ធដីជូនដល់បងប្អូនប្រជាពលរដ្ឋដែលបានកាន់កាប់​ និងអាស្រ័យផលជាក់ស្ដែងយូរឆ្នាំមកហេីយនៅលេីទីតាំងដីដែលស្ថិតនៅក្នុងផែនទីតំបន់ការពារធម្មជាតិ​ និងគម្របព្រៃនៅតាមខេត្ត​ និងត្រូវបន្ថែមការត្រៀមបម្រុងដី​ ១០%​ សម្រាប់​ការប្រេីប្រាស់រួមរបស់សហគមន៍។ ដូចនេះ​ រដ្ឋបាលថ្នាក់ក្រោមជាតិត្រូវទប់ស្កាត់ខាច់ខាតកុំឲ្យមានការរុករានទន្ទ្រានវាតយកដីរដ្ឋដោយ​ខុសច្បាប់បន្តទៀត​ ដេីម្បីបង្ការកុំឲ្យក្លាយជាសង្គ្រាមដីធ្លី។ កិច្ច​ប្រជុំ​ទទួលបានលទ្ធផលដូចខាងក្រោម៖-បន្ថែម​ការយកចិត្ត​ទុកដាក់​ក្នុងការគ្រប់គ្រងនូវទិន្នន័យ​ និងស្ថិតិប្រជាពលរដ្ឋ​ និងដីធ្លីដែលប្រជាពលរដ្ឋកំពុងកាន់កាប់​ និងអាស្រ័យផលជាក់ស្ដែងយូរឆ្នាំមកហេីយនៅលេីទីតាំងដែលស្ថិតនៅក្នុងផែនទីតំបន់ការពារធម្មជាតិ​ និងគម្របព្រៃ​ ដេីម្បីចាត់ចែងធ្វេីការកាត់ឆ្វៀលដី​ និងផ្ដល់កម្មសិទ្ធជូនពួកគាត់​ ព្រមទាំងត្រៀមរៀបចំបម្រុងដី​ ១០%​ សម្រាប់​ការប្រេីប្រាស់រួមរបស់សហគមន៍។ -ត្រូវបង្កេីនការតាមដាន​ និងគ្រប់គ្រងសភាពការណ៍វិវត្តន៍ពាក់ព័ន្ធនឹងការកាន់កាប់ដីធ្លីរបស់ប្រជពលរដ្ឋនៅតាមតំបន់ការពារធម្មជាតិ​ និងគម្របព្រៃ​ ដេីម្បីបង្ការ​ ទប់ស្កាត់​កុំឲ្យ​មាននិន្នាការរុករានទន្ទ្រានកាន់កាប់ដីព្រៃ​ ឬដីរដ្ឋដោយខុសច្បាប់​ ហេីយរាល់ទង្វេីខុសច្បាប់ទាំងនេះ​ ត្រូវហាមឃាត់ដាច់ខាត​ និងត្រូវប្រេីប្រាស់វិធានការរដ្ឋបាល​ និងវិធានការច្បាប់ឲ្យតឹងរឹង​ និងម៉ឺងម៉ាត់ដេីម្បីទប់ស្កាត់។ -​ត្រូវខិតខំអប់រំ​ ណែនាំ​ និងបកស្រាយបំភ្លឺអំពីស្ថានភាព​ នៃការកាន់កាប់ដីធ្លីរបស់បងប្អូនប្រជាពលរដ្ឋ​ និងឆន្ទៈរបស់រាជរដ្ឋាភិបាលក្នុងការប្រឹងប្រែងដោះស្រាយដីធ្លីជូនប្រជាពលរដ្ឋ​ ដេីម្បីឲ្យពួកគាត់ចូលរួមសហការជាមួយអាជ្ញាធរពាក់ព័ន្ធ​ ។ -ចំពោះ​ដីធ្លី​ដែលមានទំនាស់​ ត្រូវខិតខំសម្រុះសម្រួលដោយសន្ដិវិធី​ តម្លាភាព​ សុចរិត​ភាព​ និងយុត្តិធ៌ម​ដោយត្រូវចុះជួបផ្ទាល់ជាមួយប្រជាពលរដ្ឋ​ ដេីម្បីស្រាវជ្រាវស្វែងយល់ឲ្យបានច្បាស់អំពីសាវតាដីទំនាស់​ សាវតាប្រជាពលរដ្ឋ​ និងការទាមទារតវ៉ារបស់ប្រជាពលរដ្ឋ។ -ត្រូវណែនាំ​ដល់រដ្ឋបាលក្រុង​ ស្រុក​ ឃុំ​ សង្កាត់​ ឲ្យធ្វេីការបញ្ជាក់​ ឬចុះហត្ថលេខាលេីលិខិស្នាម​ ឬឯកសារនានាពាក់ព័ន្ធដីធ្លីឲ្យបានត្រឹមត្រូវ​តាមច្បាប់​ បែបបទនីតិវិធី​ និងគោលការណ៍ណែនាំជាធរមាន។ -ក្នុងការចាត់ចែងអនុវត្តការងារខាងលេី​ រដ្ឋបាលស្រុក​ រដ្ឋបាលខេត្តត្រូវរាយការណ៍​ និងស្នេីសុំយោបល់ពីក្រសួងរៀបចំដែនដី​ នគរូបនីយកម្ម​ និងសំណង់​ ក្រសួង​បរិស្ថាន​ និងក្រសួងកសិកម្ម​ រុក្ខាប្រមាញ់​ និងនេសាទ​ ស្របតាម​សមត្ថកិច្ចទទួលខុសត្រូវរបស់ក្រសួងពាក់ព័ន្ធនីមួយៗ។ ដូចនេះ​ រដ្ឋបាលខេត្តសូមថ្លែងអំណរគុណ​ និងសង្ឃឹមយ៉ាងមុតមាំថា​ បងប្អូន​ប្រជាពលរដ្ឋ​នឹងចូលរួមទាំងអស់គ្នា​ ដេីម្បីថែរក្សាការពារបរិស្ថាន​ ធនធានធម្មជាតិ​ ការពារដីធ្លីសាធារណៈ​ ដីសហគមន៍​ និងចូលរួមអនុវត្តច្បាប់​ ដេីម្បីរួមគ្នាបង្ការទប់ស្កាត់ការចូលទន្ទ្រានកាន់កាប់ដីព្រៃ​ ការរានពៃដេីម្បីកាន់កាប់ដី​ ការចូលទ្ទ្រានកាន់កាប់ដីសាធារណៈ​ ដីសហគមន៍​ និងដីឯកជនាមគ្រប់រូបភាព៕

បណ្ណាល័យព័ត៌មាន
ព័ត៌មានពេញនិយម
ព័ត៌មានថ្មីៗ
ពាក់ព័ន្ធបញ្ហាជំងឺ COVID-19១១៥
លេខអគ្គិភ័យ៦៦៦
សង្រ្គោះបន្ទាន់១១៩
ប៉ូលីស១១៧
SIEM REAP WEATHER
ព័ត៌មានជាប់ទាក់ទង

ផ្លូវ៦០ម៉ែត្រ ភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប

អ៊ីមែល : srphall@siemreap.gov.kh

លេខទូរស័ព្ទ : (+855)63 765 343

© 2020

រក្សាសិទ្ធិគ្រប់យ៉ាងដោយ៖ រដ្ឋបាលខេត្តសៀមរាប

កែប្រែចុងក្រោយ : 3 ថ្ងៃមុន