ឯកសារព័ត៌មានស្ថានភាពសេដ្ឋកិច្ច សង្គមកិច្ច ពិន្ទុវិស័យ អត្រាភាពក្រីក្រ ខេត្ត ក្រុង ស្រុក ឃុំ សង្កាត់ ជាឯកសារព័ត៌មានដែលមានសារៈសំខាន់បំផុតនៅក្នុងដំណើរការរៀចំកសាងផែនការនៅថ្នាក់ខេត្ត ថ្នាក់ក្រុង ស្រុក ឃុំ សង្កាត់ សម្រាប់ជាជំនួយក្នុងការដឹកនាំពិភាក្សា ដែលអាចកំណត់បាននូវបញ្ហា ទីតាំងបញ្ហា មូលហេតុនៃបញ្ហា តម្រូវការ និងដំណោះស្រាយ ហើយឯកសារពិន្ទុវិស័យ គឺងាយស្រួលក្នុងការសង្ខេបព័ត៌មានដោយវិធីងាយៗ និងអាចឃើញភ្លាមៗពីបណ្តាតំបន់ដែលបានអនុវត្តល្អ និងតំបន់ដែលត្រូវកែលម្អ, អាចប្រៀបធៀបរវាងឃុំ សង្កាត់ ក្រុង ស្រុក ឬខេត្ត យ៉ាងងាយ និងអាចឃើញក្នុងចំណោម ឃុំ សង្កាត់ ស្រុក ខេត្ត ដែលត្រូវការជួយបន្ថែម និងការយកចិត្តទុកដាក់, អាចកំណត់បានភ្លាមៗនូវចំណុចអាទិភាពក្នុងដំណើរការកសាងផែនការ,បង្ហាញពីវឌ្ឍនៈភាពតាមបណ្តាឆ្នាំ និងបង្ហាញពីលទ្ធផលនៃសកម្មភាព ដែលយើងកំពុងអនុវត្ត និងជួយក្នុងការត្រួតពិនិត្យ និងតាមដាន ។
ឯកសារនេះត្រូវបានប្រើជាឧបករណ៍សម្រាប់ការតស៊ូមតិ ការគៀងគរជំនួយ និងប្រើក្នុងដំណើរការវិភាជធនធាន ។ ការវិភាគបញ្ហា គឺជាសកម្មភាពគន្លឹះមួយក្នុងដំណើរការនៃការរៀបចំផែនការ មានន័យថា ប្រសិនបើគ្មានទិន្នន័យច្បាស់លាស់ទេ ការវិភាគបញ្ហាគឺមិនបានត្រឹមត្រូវ និងគ្រប់ជ្រុងជ្រោយ នោះលទ្ធផលនៃការអនុវត្តគម្រោងដែលកើតចេញពីការវិភាគ ពិតជាមិនអាចឆ្លើយតបទៅនឹងតម្រូវការពិតប្រាកដរបស់ប្រជាពលរដ្ឋ ក៏ដូចជាមិនអាចចូលរួមចំណែកក្នុងការអភិវឌ្ឍមូលដ្ឋាន និងការកាត់បន្ថយភាពក្រីក្របានឡើយ ។ ដូច្នេះការវិភាគបញ្ហាអោយបានគ្រប់ជ្រុង ជ្រោយគឺទាមទារនូវព័ត៌មាន និងទិន្ន័យគ្រប់គ្រាន់ ហើយច្បាស់លាស់ ។ ដូចច្នេះកម្រងឯកសារទាំងនេះត្រូវបានរៀបចំឡើងសម្រាប់បម្រើឲ្យការងារកសាងផែនការ ផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលនៅថ្នាក់ខេត្ត ក្រុង ស្រុក ឃុំ សង្កាត់ សម្រាប់កំណត់បញ្ហា តម្រូវការនៅមូលដ្ឋាន ក្នុងការផ្តល់សេវា ផ្នែកសេដ្ឋកិច្ច សង្គមកិច្ច និងកំណត់ភូមិអាទិភាពសម្រាប់ធ្វើការអភិវឌ្ឍន៍ ក៏ដូចជាជួយដល់បណ្តាមន្ទីរ-អង្គភាពជំនាញ អង្គការជាតិ-អន្តរជាតិ និងអ្នកពាក់ព័ន្ធនានា សម្រាប់កំណត់តំបន់គោលដៅ ដើម្បីផ្តល់សេវាសាធារណៈផ្សេងៗ ដល់ប្រជាពលរដ្ឋនៅមូលដ្ឋាន ។ ម្យ៉ាងវិញទៀត កម្រងឯកសារទាំងនេះ ក៏ត្រូវបានផ្តល់ជូនមន្ទីរ-អង្គភាពជំនាញ ក្រុង ស្រុក អង្គការជាតិ អន្តរជាតិនានា សម្រាប់ធ្វើការវិភាគកំណត់រកបញ្ហាអាទិភាពវិស័យនានាលើកជាគម្រោងគាំទ្រការអភិវឌ្ឍន៍នៅមូលដ្ឋាន និងធ្វើជាធាតុចូលក្នុងការរៀបចំកសាងកម្មវិធីវិនិយោគបីឆ្នាំរំកិល២០២២-២០២៤ របស់ខេត្ត ក្រុង ស្រុក ឃុំ សង្កាត់ ផងដែរ៕