![](https://asset.cambodia.gov.kh/provincial/sites/22/2021/12/264273743_2918075935170371_8344760014171520407_n-1-1024x700.jpg)
លោក ហ្គាវ៉ាហ្គុជិ មានប្រសាសន៍ថា ក្រៅពីពង្រឹងនិងពង្រីកកិច្ចសហប្រតិបត្តិកាលើគ្រប់វិស័យឱ្យកាន់តែមានសន្ទុះទៅមុខជាបន្តទៀតនោះ គឺស្វែងយល់អំពីវិធានការនិងនិតិវិធីរបស់រាជរដ្ឋាភិបាលកម្ពុជា ជាពិសេសរដ្ឋបាលខេត្តសៀមរាប ក្នុងពេលបើកដំណើរការប្រទេសទទួលភ្ញៀវទេសចរអន្តរជាតិឡើងវិញ ខណៈពេលដែលការឆ្លងរាលដាលនៃជំងឺកូវីដ-១៩ ថយចុះជាបន្តបន្ទាប់ ក្នុងនោះសម្រាប់ភ្ញៀវទេសចរជនជាតិជប៉ុន ថាតើត្រូវមានកាតព្វកិច្ចដូចម្តេចខ្លះ ដូចជាមុនចូលនិងក្រោយបញ្ចប់ទស្សនកិច្ចតាមរមណីយដ្ឋាននានានៅកម្ពុជា ជាពិសេសពួកគាត់អាចយកសំណាករកលទ្ឋផលកូវីដ-១៩នៅទីណា និង មានតម្លៃប៉ុន្មានសម្រាប់សេវាធ្វើវិភាគលើសំណាកនោះ ។
ឆ្លើយតបទៅនឹងបញ្ហានេះ លោក ពៅ ពិសិដ្ឋ បានបញ្ជាក់ថា កាលពីថ្ងៃទី១៥ ខែវិច្ឆិកា ឆ្នាំ២០២១ កន្លងទៅ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ប្រកាសបើកប្រទេសដើម្បីទទួលទេសចរអន្តរជាតិឡើងវិញ ដោយសម្រួលលក្ខខណ្ឌនៃការធ្វើដំណើរទាំងស្រុង ដោយមិនតម្រូវឱ្យធ្វើចត្តាឡីស័កឡើយ ហើយបើយោងតាមសេចក្តីជូនដំណឹងរបស់ក្រសួងទេសចរណ៍ លេខ ៤៦២ សជណ.អគឧ ស្តីពីការអនុញ្ញាតឱ្យទេសចរអន្តរជាតិ និងអ្នកដំណើរដែលបានចាក់វ៉ាក់សាំងកូវីដ-១៩ ពេញលេញ ចូលក្នុងព្រះរាជាណាចក្រកម្ពុជា ដោយមិនតម្រូវឱ្យធ្វើចត្តាឡីសក្តិ តែត្រូវអនុវត្តតាមការណែនាំ មួយចំនួនដូចជា ៖ ពេលចូលមកកម្ពុជា អ្នកទេសចរអន្តរជាតិ និងអ្នកដំណើរ ដែលបានចាក់វ៉ាក់សាំងកូវីដ-១៩ដូសមូលដ្ឋានពេញលេញ ត្រូវភ្ជាប់មកជាមួយនូវបណ្ណ ឬវិញ្ញាបនបត្រចាក់វ៉ាក់សាំងកូវីដ-១៩ ដែលបញ្ជាក់ពីការចាក់វ៉ាក់សាំងកូវីដ-១៩ដូសមូលដ្ឋានពេញលេញ និងវិញ្ញាបនបត្របញ្ជាក់ថាគ្មានកូវីដ-១៩ (ដោយម៉ាស៊ីន PCR) ដែលមានសុពលភាពរយៈពេល៧២ម៉ោង និងទទួលស្គាល់ដោយអាជ្ញាធរសុខាភិបាលនៃប្រទេសសាម៉ី ។
លោក ពៅ ពិសិដ្ឋ មានប្រសាសន៍ទៀតថា អ្នកទេសចរអន្តរជាតិ និងអ្នកដំណើរ ត្រូវធ្វើតេស្តរហ័សកូវីដ១៩ (COVID-19 Rapid Test) អនុវត្តដោយមន្រ្តីសុខាភិបាលនៅតាមច្រកទ្វារចេញ-ចូលកម្ពុជា ហើយត្រូវរង់ចាំលទ្ធផលតេស្តរហ័សរយៈពេលពី១៥ ទៅ ២០នាទីសិន។ បន្ទាប់ពីតេស្តរហ័សបង្ហាញលទ្ធផលអវិជ្ជមាន ទេសចរអាចធ្វើដំណើរបានដោយសេរីនៅទូទាំងកម្ពុជា ដោយមិនកម្រិតតំបន់ ឬខេត្ត ក្រុងនោះទេ និងមិនតម្រូវឱ្យធ្វើចត្តាទ្បីស័កទ្បើយ ប៉ុន្តែពាក់ព័ន្ធនឹងតម្លៃប៉ុន្មានសម្រាប់សេវាធ្វើវិភាគលើសំណាកនោះ រដ្ឋបាលខេត្តនឹងជូនដំណឹងជាក់លាក់នៅពេលក្រោយ ។
លោកអភិបាលរងខេត្តសៀមរាប ក៏បានលើកឡើងផងដែរ ពីទំនាក់ទំនងសហប្រតិបត្តិការដ៏ល្អរវាងខេត្តមួយចំនួននៃប្រទេសជប៉ុនជាមួយខេត្តសៀមរាប ដែលបានចុះអនុស្សរណៈជាមួយគ្នានាពេលកន្លងមក ពិសេសថ្មីៗនេះ រាជរដ្ឋាភិបាលជប៉ុន បានផ្តល់អំពូលភ្លើងបំភ្លឺផ្លូវសាធារណៈប្រភេទ LED ចំនួន២៤៥០គ្រាប់ ដែលកំពុងប្រតិបត្តិការ លើផ្លូវសំខាន់ៗក្នុងខេត្ត តាមរយៈក្រុមហ៊ុន Minibea។ -គម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាតសៀមរាប ក្រោមឥណទានរបស់ JICA មានទឹកប្រាក់វិនិយោគសរុបប្រមាណ ៩០លានដុល្លាអាមេរិក គ្របដណ្តប់លើការងារសាងសង់រោងចក្រប្រព្រឹត្តកម្ម ទឹកស្អាតថ្មីមួយទៀត សមត្ថភាព ៦០,០០០ម៣,ថ្ងៃស្ថិតក្នុងសង្កាត់ជ្រាវ នៃក្រុងសៀមរាប ដោយ យកប្រភពទឹកពីបឹងទន្លេសាប និងការសាងសង់បំពង់មេនាំទឹក និងចែកចាយទឹកស្អាត ប្រវែងសរុប ១៩៦គីឡូម៉ែត្រ៕
+10
ចូលមើលមជ្ឈមណ្ឌលព័ត៌មាន COVID-19 សម្រាប់ធនធានវ៉ាក់សាំង។
ទទួលបានព័ត៌មានអំពីវ៉ាក់សាំង
ចែករំលែក 19
ចូលចិត្ត
មតិ
ចែករំលែក