កាលពីថ្ងៃទី១៨ ខែតុលា ឆ្នាំ២០២២ ឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម លោកជំទាវសមាជិកក្រុមប្រឹក្សា និងលោកស្រី យូ សុភា អភិបាលរងខេត្តតំណាងឯកឧត្តម ទៀ សីហា អភិបាលនៃគណៈអភិបាលខេត្តបាននាំប្អូនកុមាររស់នៅសំណង់មិនរៀបរយដែលខេត្តបានបង្វឹកហាត់ភាសាក្រៅប្រព័ន្ធចំនួន ៣២០នាក់ទៅពិសាអាហារបាយសាមគ្គី។ កម្មវិធីនេះ មានការអញ្ជើញចូលរួមពីតំណាងក្រសួងមហាផ្ទៃ លោក សោម សមសក្តិ នាយកទីចាត់ការហិរញ្ញវត្ថុ និងសហការី។ឯកឧត្តម ប្រធានក្រុមប្រឹក្សាខេត្តបានបញ្ជាក់ថា កិច្ចការងារសេវាសង្គម គឺតែងតែមានការគាំទ្រ រាល់សំណើ និងការលើកឡើងនូវមតិយោបល់របស់ក្រុមការងារសេវាសង្គម ដើម្បីយកទៅអនុវត្តការងារ កាន់តែមានប្រសិទ្ធភាព ព្រមទាំងជំរុញ និងគាំទ្រ ទាំងស្មារតី និងថវិកាផងដែរ។ឯកឧត្តម ប្រធានក្រុមប្រឹក្សាខេត្តបានបន្តថា បទពិសោធន៍ក្នុងការអនុវត្តការងារសេវាសង្គមទាំងនេះ គឺបានឆ្លុះបញ្ចាំងនូវសកម្មភាពការងារដែលធ្វើឱ្យការអនុវត្តការងារសេវាសង្គមទទួលបានការកោតសរសើរនិងជាស្នាដៃឆ្នើមក្នុងការទទួលជ័យលាភីរង្វាន់ជើងឯកសេវាសង្គមលេខ ១ ដំបូងគេក្នុងប្រទេសកម្ពុជាពីក្រសួងមហាផ្ទៃផងដែរ។ ទន្ទឹមនឹងនេះ សូមមន្ត្រីពាក់ព័ន្ធទាំងអស់ត្រូវខិតខំបន្តទៀត ដើម្បីឆ្នាំក្រោយៗទៀតរដ្ឋបាលខេត្តសៀមរាបយើងទទួលបានជ័យលាភីបន្តទៀត។ រដ្ឋបាលខេត្ត សូមថ្លែងអំណរគុណមន្ទីរអង្គភាពពាក់ រដ្ឋបាលក្រុង ស្រុក និងឃុំ សង្កាត់ ដែលបានយកចិត្តទុកដាក់លើការងារសេវាសង្គមនេះ ជូនប្រជាពលរដ្ឋដែលងាយរងគ្រោះ និងមានតម្រូវការការគាំពារ។នាឱកាសពិសារអាហារសាមគ្គីនេះដែរ រដ្ឋបាលខេត្តបានឧបត្ថមដល់កុមារទាំង ៣២០នាក់ ក្នុងម្នាក់ៗពីរមុឺនរៀល៕