អគារថ្មីនៃមជ្ឈមណ្ឌលស្តារលទ្ធភាពពលកម្មកាយសម្បទាខេត្តសៀមរាប ស្ថិតក្នុងភូមិវិហារចិនសង្កាត់ស្វាយដង្គំ ក្រុងសៀមរាប ត្រូវបានសម្ពោធកាត់ខ្សែបូរដាក់ឲ្យប្រើប្រាស់ជាផ្លូវការឡើងវិញ នៅព្រឹកថ្ងៃទី០១​ ខែ ធ្នូ ឆ្នាំ២០២២ ក្រោមអធិបតីភាព ឯកឧត្តម ស៊ឹម សុធន ប្រតិភូរាជរដ្ឋាភិបាលកម្ពុជា ទទួលបន្ទុកជានាយកនៃមូលនិធិជនពិការ លោក នាក់ ណេរ៉ុន អភិបាលរងខេត្តតំណាងដ៍ខ្ពង់ខ្ពស់ ឯកឧត្តម ទៀ សីហា អភិបាលខេត្ត នៃគណៈអភិបាលខេត្តសៀមរាប ឯកឧត្តម ផាប្លូ កាង ឯកអគ្គរាជទូត នៃស្ថានទូតអូស្រ្តាលីប្រចាំកម្ពុជា ព្រមទាំងវត្តមានចូលរួមពី លោក លោកស្រី ប្រធាន អនុប្រធានមន្ទីរពាក់ព័ន្ធ ប្រធាន អនុប្រធានការិយាល័យសង្គមកិច្ចស្រុក និង ចៅសង្កាត់ទាំង១២ តំណាងអង្គការដៃគូ និងបងប្អូនជនពិការ ជាច្រើនទៀតផងដែរ ។ ទីតាំងអគារថ្មីនេះសម្រាប់ការផ្តល់សេវាស្តារលទ្ធភាពពលកម្មកាយសម្បទា ដល់បងប្អូនជនពិការ ចំនួន​ ៣ខេត្ត គឺខេត្តសៀមរាប ខេត្តកំពង់ធំ និងខេត្តព្រះវិហារ។ ការទទួលបានអគារថ្មីនេះ ស្របទៅនឹងកំណើននៃតម្រូវការសេវាស្តារលទ្ធភាពពលកម្មកាយសម្បទា វត្តមាននៃសេវាស្តារប្រកបដោយគុណភាព និង អាចទទួលយកបាន ដោយពុំមានឧបស័គ្គ ពិតជាមិនអាចខ្វះបាន ដើម្បីចូលរួមគាំទ្រដល់ជនពិការក្នុងជីវិតរស់នៅប្រចាំថ្ងៃ ប្រកបដោយភាពថ្លៃថ្នូរនិងស្មើភាពគា្នក្នុងសង្គម។ ថ្លែងក្នុងនាមក្រុមប្រឹក្សា គណៈអភិបាលខេត្ត លោក នាក់ ណេរ៉ុន មានប្រសាសន៍ថា បច្ចុប្បន្ន ព្រះរាជាណាចក្រកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោនាយករដ្ឋមន្ត្រី ក៏នៅតែធានាបាននូវឯកភាពជាតិនិងទឹកដី សន្តិភាព និង ស្ថិរភាពខាងនយោបាយ សន្តិសុខនិងសណ្តាប់ធ្នាប់សង្គមល្អប្រសើរ ដែលជាមូលដ្ឋានគ្រឹះសម្រាប់កម្ពុជាធ្វើដំណើរលើមាគ៌ានៃការគោរពសិទ្ធិមនុស្ស ការពង្រឹងនីតិរដ្ឋនិងលទ្ធិប្រជាធិបេតយ្យ ការអភិវឌ្ឍសេដ្ឋកិច្ច និងការកាត់បន្ថយភាពក្រីក្រ។ឯកឧត្តម ស៊ឹម សុធន ប្រតិភូរាជរដ្ឋាភិបាលកម្ពុជា ទទួលបន្ទុកជានាយកនៃមូលនិធិជនពិការ បានសម្តែងនូវអំណរគុណយ៉ាងជ្រាលជ្រៅចំពោះ ដល់រដ្ឋាភិបាល និងប្រជាជនអូស្រ្តាលី ដែលតែងតែផ្តល់ការគាំទ្រ​ និងការយកចិត្តទុកដាក់ដល់វិស័យពិការភាព ជាពិសេសការងារស្តារលទ្ធភាពពលកម្មកាយសម្បទានៅកម្ពុជា ជាងមួយទសវត្សកន្លងមកនេះ ក្រោមការយកចិត្តទុកដាក់គិតគូរពីសំណាក់រាជរដ្ឋាភិបាលកម្ពុជាតាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា និង ដោយមានការចូលរួមចំណែក ពីអាជ្ញាធរខេត្តនិងការគាំទ្របន្ថែមពីរដ្ឋាភិបាលអូស្រ្តាលី តាមរយៈ កម្មវិធីACCESS។ ទោះបីជាមានបញ្ហាប្រឈមយ៉ាងណាក៏ដោយ ក៏មូលនិធិជនពិការ នៅតែខិតខំប្រឹងប្រែងជម្រុញការផ្តល់សេវាជូនជនពិការ និងខិតខំស្នើសុំថវិកាពីក្រសួងសេដ្ឋកិច្ចនិងហិរញ្ញវត្ថុក៏ដូចជាដៃគូពាក់ព័ន្ធ ដើម្បីផ្តល់សេវាជូនបងប្អូនជនពិការឲ្យបានកាន់តែប្រសើរថែមទៀត ។ ឯកឧត្តមបានសូមស្នើដល់អាជ្ញាធរ និងស្ថាប័នពាក់ព័ន្ធ អង្គការដៃគូ រួមទាំងបងប្អូនជនពិការ និង ក្រុមគ្រួសារ សូមបន្តការគាំទ្រដល់មជ្ឈមណ្ឌលស្តារ និងជួយផ្សព្វផ្សាយដល់សាធារណៈជនឲ្យបានទូលំទូលាយ អំពីសេវារបស់មជ្ឈមណ្ឌលស្តារ ដើម្បីជាប្រយោជន៍ដល់ជនពិការ និងការចូលរួមកសាងសង្គមមួយប្រកបដោយបរិយាបន្ន ។ ក្នុងនោះដែរឯកឧត្តមក៏បាននាំយកនូវអំណោយជាគ្រឿងឧបភោគបរិភោគ ចែកជូនគ្រួសារជនពិការក្រីក្រ ចំនួន១៥ គ្រួសារ ទទួលបានអង្ករ ២០គក្រ .មី១កេស​ ទឹកត្រី១យូរ ,ទឹកស៊ីអ៉ីវ ១យូរ, ត្រីខ ២យូរ អំបិល ២គក្រ និងថវិកា១០ម៉ឺនរៀល ព្រមទាំងចែកជានិមិត្តរូបនូវរទេះជនពិការចំនួន១០គ្រឿងផងដែរ ៕