តាមការបញ្ជាក់របស់គណៈកម្មការរៀបចំការប្រកួត លោក លី ប៊ុនណា ប្រធានមន្ទីរអប់រំយុវជន និង កីឡា ខេត្ត បានឲ្យដឹងថា ក្រុមកីឡាករមកចូលរួមប្រកួត មាន១៤ក្រុម មកពី១២ក្រុង ស្រុក និង សាលាខេត្តសៀមរាប និង សហភាពសហព័ន្ធយុវជនកម្ពុជាខេត្ត ដោយមានក្រុមកីឡាករមួយក្រុមៗ ស្មើ ៣៦នាក់ សរុបចំនួន ៥០៤នាក់។ ចំពោះ រូបមន្តនៃការប្រកួត ធ្វើការបែងចែកពូលជា២ពូល ដោយទាត់សន្សំពិន្ទុក្នុងពូលនិមួយៗ រួចយកចំណាត់ថ្នាក់លេខ១ និងលេខ២ក្នុងពូល មកប្រកួតខ្វែងឡើងទៅពាក់កណ្តាលផ្តាច់ព្រ័ត្រ និងផ្តាច់ព្រ័ត្រ ។ ជាលទ្ធផលនៃការប្រកួត ក្នុងវគ្គផ្តាច់ព្រ័ត្រ ក្រុមទទួលជ័យលាភីរួមមានក្រុមហនុមានក្រុងសៀមរាប ទទួលបានចំណាត់ថ្នាក់លេខ១ ក្រុមហនុមានស្រុកពួក ទទួលបានចំណាត់ថ្នាក់លេខ២ ក្រុមហនុមានអង្គរទទួលបានចំណាត់ថ្នាក់លេខ៣ និង ចំណាត់ថ្នាក់លេខ៤ បានទៅក្រុមហនុមានស្រុកប្រាសាទបាគង។
លោក យុន លីនណេ បានលើកសរសើរចំពោះការរៀបចំឱ្យមានកម្មវិធីប្រកួត កីឡាបាល់ទាត់ដណ្តើមពានរង្វាន់របស់អភិបាលខេត្តនេះឡើង ដែលបានរួមសហការល្អជាមួយមន្ទីរអប់រំយុវជន និង កីឡាខេត្តក្នុងការប្រកួតកីឡាបាល់ទាត់ពានរង្វាន់រដ្ឋបាលខេត្តសៀមរាប ប្រចាំឆ្នាំ២០២៣ ដំណើរការទៅដោយប្រកបដោយជោគជ័យ សកម្មភាពនៃការចូលរួមរបស់កីឡាករមកពីក្រុង ស្រុក ក្នុងការលើកស្ទួយវិស័យកីឡាកម្ពុជាឱ្យមានកិត្តិយសលើឆាកអន្តរជាតិ។ លោកបានបន្តថាតាមរយៈនៃការប្រកួតដែលបានបញ្ចប់នាពេលនេះ យើងរកឃើញនូវកីឡាករឆ្នើមៗ ហើយក៏ជាការវាស់ស្ទង់កម្រិតបច្ចេកទេសប៉ុណ្ណោះទេ គឺផ្តល់នូវធនធានមនុស្ស ប្រកបដោយសម្បទាមាំមួន សុខភាពល្អ និង ប្រាជ្ញាឈ្លាសវៃ មានការសាមគ្គីល្អ ទូលំទូលាយ ក្នុងការរួមគ្នាថែរក្សាការពារបូរណភាពទឹកដី ប្រពៃណីទំនៀមទំលាប់ឲ្យបាន គង់វង្ស។
លោកក៏បានផ្តាំផ្ញើ និង អំពាវនាវដល់គ្រប់ស្ថាប័ន សហគមន៍ គ្រឹះស្ថានសិក្សា បន្តនូវវប្បធម៌សាមគ្គី ដើមី្បវិស័យកីឡាមានការអភិវឌ្ឍន៍រីកចម្រើនក្នុងគោលដៅសុខមាលភាពផ្លូវកាយ បញ្ញាស្មារតី ដើមី្បរួមចំណែកលើកស្ទួយកិត្យានុភាពជាតិ កីឡានាំមកនូវសន្តិភាព ។ ម៉្យាងទៀតក្រុមកីឡាករទាំងអស់ កុំមោទនភាពនូវជ័យជំនះរបស់ខ្លួន គឺត្រូវខិតខំហ្វឹកហាត់នូវបច្ចេកទេសរបស់ខ្លួនបន្តថេមទៀត ទាំងអ្នកឈ្នះ អ្នកចាញ់ ដើមី្បជាមូលដ្ឋានគ្រឹះក្នុងការដណ្តើមភាពឈ្នះនៅឆ្នាំក្រោយៗទៀត និងសូមក្រុមកីឡាករទាំងអស់ ដែលមានឈ្មោះក្នុងបញ្ជីបោះឆ្នោត សូមអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៧ នៅថ្ងៃទី ២៣ កក្កដា ឆ្នាំ២០២៣ខាងមុខនេះ ។
ក្នុងនោះលេខ១ ទទួលបានថវិកា ១០លានរៀល និងពានរង្វាន់មួយ និងមេដាយចំនួន៣៦គ្រឿង និង លេខ២ ទទួលបានថវិកា ៥លានរៀល និងមេដាយចំនួន ៣៦គ្រឿង និង លេខ៣ ទទួលបាន ថវិកា ៣លានរៀល ,លេខ៤ ទទួលបាន ថវិកា ១លាន៥០ម៉ឺនរៀល ៕