រដ្ឋបាលខេត្តសៀមរាប

Siemreap Administration
ស្វែងរក

សាខាកាកបាទក្រហមកម្ពុជាខេត្តសៀមរាប​ ប្រគល់ផ្ទះមនុស្សធម៌ទី៨៧ និងចែកអំណោយដល់គ្រួសារក្រីក្រ នៅស្រុកវ៉ារិន

  • 121
  • ដោយ vannak

ក្រោមការផ្ដួចផ្ដើមគំនិតរបស់ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានសាងសង់ផ្ទះមនុស្សធម៌ទី៨៧ និងត្រូវបានធ្វើពិធីប្រគល់ជូនលោកតា សាត រើន អាយុ​ ៧៣ឆ្នាំ និងលោកយាយ ឆែម អាន អាយុ ៧០ឆ្នាំ មានសហជិកគ្រួសារ​ ៤នាក់ កូនជាជនពិការដោយសង្រ្គាម និង កូនស្រីជាស្តី្រម៉េម៉ាយ និងចៅៗស្ថិតក្នុងបន្ទុក រស់នៅភូមិ ល្វា ឃុំ ស្រែណូយ ស្រុកវ៉ារិន ខេត្តសៀមរាប ព្រមទាំងចែកអំណោយដល់គ្រួសារក្រីក្រ ១០០គ្រួសារជួបការលំបាក ក្រោមអធិបតីភាពលោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប និង លោកជំទាវ ជាសហការី ប្រធានអនុសាខាស្រុក និង អាជ្ញាធរមូលដ្ឋាន នាព្រឹកថ្ងៃទី ២៨ ខែកក្កដា ឆ្នាំ២០២៣ ។ ផ្ទះមនុស្សធម៌នេះមានទំហំ ៦ម៉ែត្រ គុណនឹង ៦ម៉ែត្រ មាន២បន្ទប់ ដំបូលប្រក់ស័ង្គសីភ្លីក្បឿង ជញ្ជាំងស្មាតបត បាតក្រាលការ៉ូ មានកម្ពស់ផុតពីដី ០.៥ម៉ែត្រ សាងសង់ឡើងដោយថវិកា សាខាកាកបាទក្រហមកម្ពុជា ខេត្តសៀមរាប ក្នុងទឹកប្រាក់ ៣ពាន់៨០០ដុល្លា ។មានប្រសាសន៍សំណេះសំណាលជាមួយលោកតា លោកយាយ ម្ចាស់ផ្ទះ និង អ៊ុំពូមីង នៅក្នុងឱកាសនេះលោកជំទាវ ទាង អេង ទៀសីហា អនុប្រធានគណៈកម្មាធិការសាខា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល”។ ផ្ទះមនុស្សធម៌នេះប្រគល់ជូនគ្រួសារលោកតា សាត រើន និងលោកយាយ ឆែម អាន ចាប់ពីពេលនេះទៅ ដើម្បីបានជាជម្រក បានជាម្លប់ដ៏កក់ក្តៅតរៀងទៅ ។ លោកជំទាវ ក៏បានក្រើនរម្លឹកដល់លោកយាយ លោកតា អ៊ុំពូមីង សូមថែរក្សាសុខភាពខ្លួន ប្រសិនបើបងប្អូន និងកូនមានជំងឺ និងគ្រោះថ្នាក់ផ្សេងៗ សូមប្រញាប់បញ្ជូនទៅមណ្ឌលសុខភាពដែលនៅជិតបំផុត ។ ជាសំខាន់នោះចំពោះសុខភាពកុមារ និងស្ត្រីមានផ្ទៃពោះ ព្រមទាំងមានការប្រុងប្រយ័ត្នចំពោះកុមារតូចៗ នៅក្នុងរដូវវស្សានេះ ដែលពោពេលទៅដោយទឹក នៅតាមស្ទឹង អូរ ប្រឡាយ ត្រពាំង ដើមី្បជៀសវាងកើតឡើងនូវប្រការអាក្រក់ណាមួយ ចំពោះ ក្រុមគ្រួសារបងប្អូន និង ធ្វើអនាម័យ បរិស្ថាននៅជុំវិញលំនៅដ្ឋាន និង បំបាត់ទីជម្រកមូសខ្លា ដែលជាភ្នាក់ងារជំងឺគ្រូនឈាម មកលើកុមារ ក៏ដូចមនុស្សគ្រប់វ័យផងដែរ ។ ក្នុងនោះដែរលោកជំទាវ ក៏បានសម្តែងនូវការអាឡោះអាល័យ ចំពោះបងប្អូន ប្រជាពលរដ្ឋក្នុងស្រុកវ៉ារិន ក៏ដូទូទាំងខេត្ត ដែលនៅពេលខាងមុខនេះ ឧត្តមស្វាមីរបស់លោកជំទាវ បានទៅទទួលមុខតំណែង ថ្មី ធ្វើឲ្យលោកជំទាវឃ្លាតឆ្ងាយពីបងប្អូន ហើយការឃ្លាតទៅឆ្ងាយកាយមែនពិត តែចិត្តនិត្យនៅជាមួយពុកម៉ែ បងប្អូនជានិច្ច នៅខេត្តសៀមរាប ដែលជាកន្លែងផ្តល់កំណើតដល់បុត្រាបុត្រីរបស់លោកជំទាវផងដែរ។​ អំណោយមនុស្សធម៌បន្ថែមសម្រាប់គ្រួសារទទួលបានផ្ទះមាន អង្ករ ៦០គ.ក្រ ,មី ២កេស , ត្រីខ ២យួរ ,ទឹកត្រី ២យួរអំបិល ២គ.ក្រ, ស្ករស ២គ.ក្រ ,កន្ទេល២ ,ខ្នើយ២ ,មុង ៤ ,ភួយ៤ , សារុង២ , ក្រមា២ , សម្ភារៈផ្ទះបាយមួយចំនួន និងថវិកា៤សែនរៀល ព្រមទាំងក្រុមការងារក៏បានធ្វើការឧបត្ថម្ភថវិកាបន្ថែមមួយចំនួនធំផងដែរ ។ក្នុងឱកាសនេះដែរសម្រាប់បងប្អូនគ្រួសារក្រីក្រចូលរួមក្នុងពិធីប្រគល់ផ្ទះនេះចំនួន១០០នាក់ ម្នាក់ៗទទួលបាន៖ អង្ករ៣០គីឡូក្រាម, មី១កេស, ត្រីខ១យួរ,​ ទឹកត្រី១យួរ ,ស្ករស១គ.ក្រ ,អំបិល ១គ.ក្រ , មុខ១ ,ភួយ១, សារុង១ , ក្រមា ១ និងថវិកា៤ម៉ឺនរៀល សូមបញ្ជាក់ថាផ្ទះមនុស្សធម៌នេះជាសមិទ្ធផលថ្មីទី១៥ សម្រាប់សាខាកាកបាទក្រហមកម្ពុជា ខេត្តសៀមរាប ក្នុងអាណត្តិទី៥ និងជាផ្ទះមនុស្សធម៌ទី ៨៧ របស់សាខាកាកបាទក្រហមកម្ពុជា ខេត្តសៀមរាប ក្នុងរយៈពេលកន្លងមក ។ បន្ទាប់ពីពីធីប្រគល់ផ្ទះចប់សព្វគ្រប់ លោកជំទាវ អនុប្រធានគណៈកម្មាធិការសាខា និងប្រតិភូ បានរៀបចំ និងអញ្ជើញលោកយាយ លោកតា និងសមាជិកនៃពិធីនេះ ពិសានំបញ្ចុកសាមគ្គីទាំងអស់គ្នានៅទីនេះផងដែរ ៕

អត្ថបទទាក់ទង