នាព្រឹកថ្ងៃអង្គារ ២កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០៦ ខែសីហា ឆ្នាំ២០២៤ រដ្ឋបាលខេត្តសៀមរាប បានសហការជាមួយអង្គការGIZ និងសាកលវិទ្យាល័យអង្គរ រៀបចំវគ្គបណ្តុះបណ្តាលស្តីពីរចនាទីក្រុងនាពេលអនាគត ក្រោមអធិបតីភាព លោក យុន លីនណេ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប លោក អេង គឹមហ៊ង ទីប្រឹក្សាបច្ចេកទេសGIZ ដោយមានការចូលរួមពីមន្ត្រីរដ្ឋបាលខេត្ត ក្រុមការងារGIZ ក្រុមការងារសាកលវិទ្យាល័យអង្គរ តំណាងយុវជនសង្កាត់ទាំង១២ នៃក្រុងសៀមរាប យុវជនសហភាពសហព័ន្ធយុវជនកម្ពុជាខេត្តសៀមរាប យុវជនកាកបាទក្រហម និងយុវជនកាយរិទ្ធសរុប ចំនួន ២៦៤រូប។ វគ្គបណ្តុះបណ្តាលនេះ គឺដើម្បីអប់រំ និងផ្តល់សិទ្ធិអំណាចដល់យុវជនខេត្តសៀមរាប ក្នុងការរចនាផ្លូវដែលពួកគេចង់រស់នៅនាពេលអនាគត។ លើសពីនេះ វគ្គបណ្តុះបណ្តាលក៏បានរួមបញ្ចូលការធ្វើបទបង្ហាញអំពីប្រវត្តិផ្លូវនានាក្នុងខេត្តសៀមរាប និងការយល់ដឹងអំពីការអភិវឌ្ឍទីក្រុង ព្រមទាំងការយល់ដឹងអំពីតួនាទី និងសារៈសំខាន់នៃដើមឈើនៅក្នុងទីក្រុង និងសេវាកម្មប្រព័ន្ធអេកូឡូស៊ី ជាពិសេស គឺដើម្បីផ្តល់ឱកាសដល់យុវជនសង្កាត់ទាំង១២ក្នុងក្រុងសៀមរាប ចូលរួមប្រឡងប្រណាំងដណ្តើមជ័យលាភី ក្នុងបង្កើតគំនិតច្នៃប្រតិដ្ឋអំពីការរចនាផ្លូវ ក្នុងសង្កាត់ទាំង១២ដែលខ្លួនបានរស់នៅប្រកបដោយភាពស្រស់ស្អាតដែលខ្លួនចង់បាននាពេលអនាគត។