ថ្ងៃទី២១ ខែសីហា ឆ្នាំ២០២៤ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប និងឯកឧត្តម លោកជំទាវ សមាជិកក្រុមប្រឹក្សាខេត្តសៀមរាប អញ្ជើញចូលរួមសិក្ខាសាលាពិគ្រោះយោបល់ក្នុងគោលបំណងប្រមូលធាតុចូលរៀបចំឯកសារជំនួយស្មារតីលើការងារត្រៀមបម្រុង និងឆ្លើយតបគ្រោះមហន្តរាយក្រោមអធិបតីភាពរបស់ ឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ និងប្រធានសមាគមជាតិក្រុមប្រឹក្សារាជធានី ខេត្ត ថ្នាក់ដឹកនាំសមាគម, ក្រុមប្រឹក្សាខេត្តកំពត និងក្រុមប្រឹក្សាខេត្តសៀមរាប សរុបចំនួ ៤០ រូប ក្នុងក្របខណ្ឌគម្រោង “ការឆ្លើយតបគ្រោះមហន្តរាយ” ដែលគាំទ្រដោយសមាគមអន្តរជាតិអភិបាលក្រុងប្រើប្រាស់ ភាសាបារាំង (AIMF)។ នៅក្នុងសិក្ខាសាលា ឯកឧត្តមប្រធានក្រុមប្រឹក្សា និងឯកឧត្តម លោកជំទាវសមាជិកក្រុមប្រឹក្សា បានចូលរួមពិភាក្សាអំពីការងារគ្រប់គ្រងគ្រោះមហន្តរាយនៅថ្នាក់រាជធានី ខេត្ត និងផ្តល់ធាតុចូលបន្ថែមលើគោលគំនិតក្នុងការរៀបចំឯកសារជំនួយស្មារតីលើការងារត្រៀមបម្រុង និងឆ្លើយតបគ្រោះមហន្តរាយ។គម្រោង “ការឆ្លើយតបគ្រោះមហន្តរាយ” នេះ អនុវត្តពីខែកក្កដា ឆ្នាំ២០២៣ ដល់ខែធ្នូ ឆ្នាំ២០២៤ គឺបន្តពីគម្រោង ពីគម្រោង “ពង្រឹងសមត្ថភាពអាជ្ញាធររដ្ឋបាលថ្នាក់ក្រោមជាតិនៅកម្ពុជា ក្នុងការរៀបចំផែនការនគរូបនីយកម្ម និងការគ្រប់គ្រងដីធ្លី ដើម្បីកែប្រែមុខមាត់សហគមន៍មិនទាន់រៀបរយ និងធានាបាននូវលទ្ធភាពក្នុងការទទួលបានសេវាសាធាររណៈ ជាសារវ័ន្ត” អនុវត្តពីឆ្នាំ២០១៩ ដល់ឆ្នាំ២០២១ ក្រោមការគាំទ្រពី EU ហើយដៃគូអនុវត្តគម្រោងរួមមាន AIMF សាលាក្រុងប៉ារីស រដ្ឋបាលរាជធានីភ្នំពេញ សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន និងសមាគមជាតិក្រុមប្រឹក្សារាជធានី ខេត្ត។ មកដល់បច្ចុប្បន្ននេះ នៅកម្ពុជា មានសមាគមអាជ្ញាធរមូលដ្ឋានគឺ សមាគមជាតិក្រុមប្រឹក្សារាជធានី ខេត្ត និងរដ្ឋបាលរាជធានី ខេត្ត ចំនួន ៥ គឺ រដ្ឋបាលរាជធានីភ្នំពេញ រដ្ឋបាលខេត្តសៀមរាប រដ្ឋបាលខេត្តបាត់ដំបង រដ្ឋបាលខេត្តកំពត និងរដ្ឋបាលខេត្តព្រះសីហនុ បានចូលជាសមាជិករបស់ AIMF។