ដើមឈើ ឥន្ធនេល ចំនួន ១ពាន់៦០០ដើម ត្រូវបានធ្វើការដាំអមសង្ខាងដងវិថី តេជោ សន្តិភាព (ផ្លូវវាងក្រុង) ស្ថិតក្នុងភូមិសាស្ត្រ៤សង្កាត់ មាន សង្កាត់សាលាកំរើក សង្កាត់ស្វាយដង្គំ សង្កាត់ស្រង៉ែ និង សង្កាត់ទឹកវិល ក្រុង ខេត្តសៀមរាប ដើមី្បលើកកម្ពស់បរិស្ថាន សោភណ្ឌភាពដងវិថីក្នុងក្រុងប្រវត្តិសាស្ត្រសៀមរាប កាលចុងសប្តាហ៍ព្រឹកថ្ងៃទី ៣១ ខែ សីហា ឆ្នាំ២០២៤ ក្រោមវត្តមានដ៏ខ្ពង់ខ្ពស់របស់ឯកឧត្តម ប្រាក់ សុខុន ប្រធានស្ដីទីព្រឹទ្ធសភា និងលោកជំទាវ ឯកឧត្តម ប្រាក់ សោភ័ណ អភិបាល នៃគណៈអភិបាល ខេត្តសៀមរាប ព្រមទាំងឯកឧត្ត លោកជំទាវជាសមាជិកព្រឹទ្ធសភាព សមាជិកក្រុមប្រឹក្សាខេត្ត អស់លោក លោកស្រីជាគណៈអភិបាលខេត្ត ថ្នាក់ដឹកនាំមន្ទីរ អង្គភាព អាជ្ញាធរក្រុង មន្ត្រីរាជការ កងកម្លាំងទាំងបី សហភាពសហព័ន្ធយុវជនកម្ពុជាខេត្ត យុវជនកាកបាទក្រហមកម្ពុជា យុវជនកាយរិទ្ធកម្ពុជា ចៅសង្កាត់ ប្រជាការពារ និងប្រជាពលរដ្ឋ ប្រមាណ ជាង ១ពាន់ចូលរួម ។តាមការបញ្ជាក់របស់ឯកឧត្តម ប្រាក់ សោភ័ណ បានមានប្រសាសន៍បញ្ជាក់ថា ការដាំឈើនាពេលនេះ មានអត្ថន័យដ៏ជ្រាលជ្រៅសម្រាប់ចលនាបំផុសស្មារតីប្រជាពលរដ្ធ មន្ត្រីរាជការ សិស្សានុសិស្ស និងកងកម្លាំងប្រដាប់អាវុធយើង ឲ្យចេះស្រឡាញ់ ព្រៃឈើ និង ចូលរួមដាំដុះ និងការពារព្រៃឈើ ក៏ដូចជាជួយជម្រុញផលប្រយោជន៍ដល់ប្រជាពលរដ្ឋយើង ក្នុងជីវភាពរស់នៅ បង្កបង្កើនផលកសិកម្ម និងបង្កើនសុខមាលភាពគ្រួសារ ព្រមទាំងជួយលើកស្ទួយ បរិស្ថាន សង្គម សំខាន់ក្នុង ការលើកកម្ពស់សោភ័ណ្ឌភាពក្រុងសៀមរាប ក្នុងការទទួលស្វាគមន៍ដល់គណៈប្រតិភូជាន់ខ្ពស់ជាតិ អន្តរជាតិ និង ភ្ញៀវទេសចរណ៍ជាតិ អន្តរជាតិផងដែរ ។ ឯកឧត្តមបានបន្តទៀតថា ព្រៃឈើមានតួនាទីសំខាន់ ដែលជាសរសៃឈាម ក្នុងវិស័យ កសិកម្មជាតិ ជាអាយុជីវិតប្រជាកសិករ និង ជាខឿននៃសេដ្ឋកិច្ចជាតិ ហើយព្រៃឈើ ថែរក្សាដំណើរការប្រព័ន្ធអេកូឡូស៊ី តាមរយៈការជួយធ្វើនិយ័តកម្ម អាកាសធាតុ ជួយកាត់បន្ថយឥទ្ធិពលអវិជ្ជមាននៃការប្រែប្រួលអាកាសធាតុ ដូចជាទឹកជំនន់ ខ្យល់ព្យុះ និងការស្រូបយកឧស្ម័នកាបូនិចពី បរិយាកាសរក្សាស្ថិរភាពបរិយាកាស។ ទន្ទឹមនេះព្រៃឈើផ្តល់នូវសេវាកម្ម និងជួយគាំពារផ្នែកបរិស្ថានជាច្រើនទៀតដូចជា ការការពារទីជម្រាល ទប់ស្កាត់ការហូរច្រោះដី ការធ្វើឲ្យប្រសើរឡើងនៃគុណភាពដី និង ផ្តល់នូវផលអនុផលព្រៃឈើជាច្រើនអនេកដល់ប្រជាពលរដ្ឋ ក្នុងជីវភាពប្រចាំថ្ងៃ។ ឯកឧត្តមអភិបាលខេត្ត ក៏អំពាវនាវដល់ប្រជាពលរដ្ឋគ្រប់រូប ដែលកំពុងបន្តអាជីវកម្មកាប់បំផ្លាញព្រៃឈើ ដើម្បីទន្ទ្រានយកដីព្រៃ ការដុតព្រៃឈើយកដីរដ្ឋធ្វើកម្មសិទ្ធិ សូមបញ្ឈប់ជាបន្ទាន់ ព្រោះការធ្វើអាជីវកម្មព្រៃឈើនិងជំនួញដីព្រៃឈើ ខុសច្បាប់គឺ ជាបទល្មើសដ៏ធ្ងន់ធ្ងរបំផុត ជាពិសេសបង្កនូវគ្រោះមហន្តរាយដល់បរិស្ថាន ធម្មជាតិ ដែលបណ្តាលមកពីការកាប់បំផ្លាញព្រៃឈើ ។ ម៉្យាងទៀត យើងត្រូវរួមសាមគ្គីគ្នា បណ្តុះឡើងវិញនូវគំនិតស្រឡាញ់ព្រៃឈើ ថែរក្សាការពារព្រៃឈើនិងបណ្តុះឡើងវិញនូវ ទស្សនៈ សន្សំសំចៃ ក្នុងការប្រើប្រាស់ផលអនុផលព្រៃឈើ គ្រប់ប្រភេទ និង បណ្តុះឡើងវិញនូវស្មារតីគោរពច្បាប់ អនុវត្តច្បាប់ ដើម្បីរួមចំណែកកសាងព្រះរាជាណាចក្រកម្ពុជាឲ្យទៅជានីតិរដ្ឋ ។ ឯកឧត្តម ប្រាក់ សោភ័ណ បានគូសបញ្ជាក់ថា ដើមឈើដែលបានដាំនៅអមសង្ខាងវិថីតេជោសន្តិភាពថ្ងៃនេះ មានចំនួន ១ពាន់៦០០ដើម ប្រភេទឈើ ឥន្ធនេល ។ ឯកឧត្តមបានបញ្ជាក់ថា ចំពោះកូនឈើដែលបានដាំរួចហើយនៅតាមដងវិថីក្នុងក្រុង សូមអាជ្ញាធរគ្រប់លំដាប់ថ្នាក់ និង ប្រជារាស្ត្រ នៅនឹងកន្លែង មេត្តាសកម្មចូលរួម ថែរក្សាឲ្យបានម៉ត់ចត់ជាប្រចាំ ដើម្បីធ្វើឲ្យកូនឈើទាំងនោះ មានសុខភាពល្អ លូតលាស់ ធំធាត់ឆាប់រហ័ស និងពុំបាត់បង់ទៅវិញ ។រដ្ឋបាលខេត្តសៀមរាប បានផ្តួចផ្តើមយុទ្ធនាការដាំកូនឈើ ក្នុងឱកាសរុក្ខទិវានៅភូមិសាស្ត្រក្រុង ស្រុកទាំង១៣ មាន ២៩ប្រភេទ សរុបបានចំនួន ៨១ពាន់២៤៥ដើម និង មានអ្នកចូលរួមដាំចំនួន ១៨ ពាន់២១២នាក់ ផងដែរ។ ឯកឧត្តមក៏បានសំដែងនូវអំណរគុណយ៉ាងជ្រាលជ្រៅ បំផុតចំពោះឯកឧត្តមប្រធានស្តីទីព្រឹទ្ធសភា និងប្រតិភូ រួមទាំងអស់ លោក លោកស្រីដែលបានចូលរួមការដាំដើមឈើនេះ ដែលកំពុងយកចិត្តទុកដាក់ជួយដល់ខេត្តសៀមរាប ក្នុងកិច្ចថែរក្សា ធនធានធម្មជាតិជាពិសេសព្រៃឈើដែលជាបញ្ហាចំបង មានសារៈសំខាន់ ដល់ការរស់រាននិងការអភិវឌ្ឍន៍សង្គមជាតិកម្ពុជាទាំងពេលបច្ចុប្បន្ន ក៏ដូចទៅពេលអនាគត ៕