នាថ្ងៃទី៩​ ខែតុលា​ ឆ្នាំ២០២៤នេះ​ នៅសាលប្រជុំសាលាខេត្ត​ លោក​ យុន​ លីនណេ​ អភិបាលរងខេត្តតំណាងឯកឧត្តម​ ប្រាក់​ សោភ័ណ​ អភិបាលខេត្តបានដឹកនាំកិច្ចប្រជុំសាមញ្ញលើកទី២ នៃវេទិកាទីក្រុង ឆ្លាតសៀមរាប នៃគម្រោងទីក្រុងឆ្លាតវៃក្រុងសៀមរាប (The 2nd General Meeting of Siem Reap Smart City Consortium) ដែលជាគំនិតផ្តួចផ្តើមជំហ៊ានដំបូង នៃយន្តការសហប្រតិបត្តិការរវាងរដ្ឋ វិស័យឯកជន សហគមន៍ និងវិស័យអប់រំ ដើម្បីសម្រេចបានគម្រោងទីក្រុងឆ្លាតវៃក្រុងសៀមរាបនាពេលអនាគត និងស្របតាមផែនទីបង្ហាញផ្លូវទីក្រុងឆ្លាតវៃសៀមរាប​ ដោយមានការចូលរួមពីតំណាងភាគីជប៉ុន​ លោកស្រី​ អភិបាលរងក្រុង​ លោក​ នាយកទីចាត់ការនៃសាលាខេត្ត​ មន្ទីរ​ អង្គភាពពាក់ព័ន្ធ​ និងវិស័យឯកជនផងដែរ។

លោក​ អភិបាលរងខេត្តបានបញ្ជាក់ថា​ ក្រុមការងារបច្ចេកទេសទីភ្នាក់ងារJICA បានធ្វេីការសិក្សា និងការរៀបចំផែនការយុទ្ធសាស្ត្រអភិវឌ្ឍន៍ទីក្រុងសៀមរាប នៃខេត្តសៀមរាបឱ្យក្លាយទៅជាទីក្រុងឆ្លាតវៃ។ បន្ទាប់ពីរដ្ឋបាលខេត្តសៀមរាប បានដាក់ឱ្យប្រើប្រាស់ផ្លូវការនូវផែនទីបង្ហាញផ្លូវទីក្រុងឆ្លាតវៃ ទន្ទឹមនឹងនេះ រដ្ឋបាលខេត្តសៀមរាបក៏បានសហការអនុវត្តនូវគម្រោងសាកល្បងចំនួន ០៨គម្រោង សម្រាប់វគ្គទី១ រួមមាន ១). ការកែលម្អការប្រមូលសំរាម ២). ការត្រួតពិនិត្យការចតយានយន្ត ខុសច្បាប់ ៣). ឌីជីថលនីយកម្ម នៃស្ថិតិទេសចរណ៍ ៤). ប្រព័ន្ធតាមដានលំហូរឯកសារផ្ទៃក្នុងរបស់រដ្ឋបាល ខេត្ត ៥). គម្រោងត្រួតពិនិត្យបរិស្ថានទីក្រុងដោយប្រើប្រាស់ឧបករណ៍ចាប់សញ្ញា(Sensor) ៦). កិច្ចសហ-ការ រវាងរដ្ឋ និងឯកជនក្នុងវិស័យទេសចរណ៍ ៧). ការប្រមូល និងដឹកជញ្ជូនសំរាមឆ្លាតវៃ និង៨). ថ្នាលទិន្នន័យ ទីក្រុងឆ្លាតវៃសៀមរាប (SSDaP)។ ក្នុងនោះមានគម្រោងសាកល្បង ការកែលម្អការប្រមូលសំរាម និងឌីជីថលនីយកម្ម នៃស្ថិតិទេសចរណ៍ ដែលត្រូវបានអនុវត្ត និងបញ្ចប់រួចរាល់។ ចំណែកគម្រោងសាកល្បង ចំនួន៣ ទៀតគឺបានអនុវត្ត និងបានផ្ទេរជូនមករដ្ឋបាលខេត្ត ដើម្បីគ្រប់គ្រង ប្រតិបត្តិការ និងថែទាំ ជួសជុល។

បន្ទាប់ពីលោក​ អភិបាលរងខេត្តមានមតិរួច​ អង្គប្រជុំក៏បានអនុញ្ញាតឱ្យតំណាងទីក្រុង​ Takamastu តំណាងរដ្ឋបាលខេត្ត​ និងវិស័យឯកជនមួយចំនួនផងដែរ។ ជាមួយនឹងបទបង្ហាញទាំងនេះ​ អង្គប្រជុំក៏បានលេីកឡេីងនូវសំណួរ​ និងមានការឆ្លេីយតបផងដែរ។

លោក​ អភិបាលរងខេត្ត​ ក៏បានថ្លែងអំណរគុណដល់ក្រុមការងារជប៉ុន​ ក៏ដូចជាក្រុមការងារសាលាខេត្ត​ និងវិស័យឯកជនទាំងអស់ដែលបានចូលចែករំលែកបទពិសោធន៍នាពេលនេះ។ លោក​ បានបន្តដាបន្ទាប់ពីកិច្ចប្រជុំនេះ​ សង្ឃឹមថាវិស័យឯកជនទាំងអស់នឹងផ្សព្វផ្សាយបន្តការងារទីក្រុងឆ្លាតវៃនេះឱ្យកាន់តែទូលំទូលាយ​ ពិសេសការចូលរួមវិនិយោគ​លេីការងារទីក្រុងឆ្លាតវៃនេះឱ្យស្របតាមផនទីចង្អុលផ្លូវដែលបានដាក់ចេញ។ ម្យ៉ាងទៀត​ លោក​ ក៏បានជំរុញដល់លោក​ លោកស្រី​ សាស្ត្រាចារ្យតាមបណ្តាសាកលវិទ្យាល័យទាំងអស់ជួយជំរុញដល់សិស្ស​ និស្សិតឱ្យចូលរួមប្រកួតប្រជែងដោយរៀបចំជាគម្រោង​ នៃការសាកល្បងទីក្រុងឆ្លាតវៃ​នាពេលអនាគត។សូមបញ្ជាក់ផងដែរថា ការទទួលពាក្យចាប់ពីថ្ងៃទី៩ ខែតុលា ដល់ថ្ងៃទី១៩ ខែវិច្ឆិកា ឆ្នាំ២០២៤ តាមរយៈតំណភ្ជាប់ដូចខាងក្រោម។siemreap_smart@googlegroups.com https://drive.google.com/.../11gG-H1Vx...