ថ្ងៃទី១១ ខែវិច្ឆិកា ឆ្នាំ២០២៤ លោក អ៉ឹង គឹមលាង អភិបាលរងខេត្ត តំណាងដ៏ខ្ពស់ខ្ពស់ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប បានចូលរួមបើកវគ្គបណ្ដុះបណ្ដាលស្ដីពី FishTech Masterclass 2024 ដែលដឹកនាំដោយឯកឧត្តម ឃុន សាវឿន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពី មានការអញ្ជើញចូលរួមពីអនុរដ្ឋលេខាធិកា ក្រសួងធនធានទឹក និងឧតុនិយម អនុរដ្ឋលេខាធិការក្រសួងរ៉ែ និងថាមពល អនុរដ្ឋលេខាធិការក្រសួងបរិស្ថាន អនុរដ្ឋលេខាធិការក្រសួងសាធារណការ និងដឹកជញ្ជូន អនុរដ្ឋលេខាធិការក្រសួងអភិវឌ្ឍន៍ជនបទ ក្រសួងសុខាភិបាល អនុរដ្ឋលេខាធិការក្រសួងផែនការ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម អនុប្រធានរដ្ឋបាលជលផល អភិបាលរងនៃគណៈអភិបាលខេត្តបន្ទាយមានជ័យ និងឯកឧត្តម លោកជំទាវ លោក លោកស្រីជាភ្ញៀវកិត្តិយសជាតិ និងអន្តរជាតិ នៅសណ្ឋាគារ រីជឹនស៊ី អង្គរ។

ឯកឧត្តម ឃុន សាវឿន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ទន្លេមេគង្គក៏ជាជម្រករបស់ត្រីជាច្រើនប្រភេទដែលមិនបានឃើញពីកន្លែងណាផ្សេងទៀតក្នុងពិភពលោក។ មានត្រីទឹកសាបជាង ១,០០០ ប្រភេទនៅក្នុងទន្លេមេគង្គ។ ត្រីទាំងនេះមានចាប់ពី ត្រីដែលមានទំហំតូចៗ រហូតដល់ត្រីដែលមានទំហំធំអាចលូតលាស់មានប្រវែងជាង ៣ម៉ែត្រ និងទម្ងន់ជាង ៣០០គីឡូក្រាម ដែលបានផ្សព្វផ្សាយនៅក្នុងព័ត៌មានអន្តរជាតិថាជាត្រីទឹកសាបដែលធំជាងគេបំផុតក្នុងកំណត់ត្រាពិភពលោក។ ចំណែកឯត្រីតូចៗ ដូចជាពពួកត្រីចង្វា ដែលត្រូវបានរកឃើញនៅតំបន់ដីសើមជាច្រើនតាមដងទន្លេមេគង្គ។ ដូច្នេះវាមានសារៈសំខាន់ខ្លាំងណាស់ ដែលយើងធ្វើអស់ពីសមត្ថភាពដើម្បីការពារធនធានដ៏សំខាន់នេះទាំងក្នុងពេលបច្ចុប្បន្ន និងអនាគត។ នៅកម្ពុជាការអភិវឌ្ឍហេដ្ឋារចនាសម្ព័ន្ធបានកើតឡើងយ៉ាងឆាប់រហ័សក្នុងពេលប៉ុន្មានឆ្នាំថ្មីៗនេះ ជាពិសេសការសាងសង់ផ្លូវ និងប្រព័ន្ធធារាសាស្ត្រ។ ទាំងនេះគឺជាអាទិភាពរបស់រដ្ឋាភិបាលកម្ពុជាក្នុងការជួយដល់សន្តិសុខស្បៀង ការកាត់បន្ថយភាពក្រីក្រ និងការនាំចេញដំណាំ។ ការអភិវឌ្ឍទាំងនេះនឹងផ្តល់អត្ថប្រយោជន៍យ៉ាងច្រើនដល់វិស័យកសិកម្ម ប៉ុន្តែយើងកំពុងសិក្សាថាវាប៉ះពាល់ដល់ការធ្វើបន្លាស់ទីរបស់ត្រី និងនាំឱ្យមានការថយចុះផលិតកម្មត្រី។ ការសាងសង់ជណ្ដើរត្រីដ៏ល្អ និងរឆ្លងកាត់តាមខ្សែទឹកអាចអនុញ្ញាតឱ្យត្រីធ្វើការបន្លាស់ទី និងជួយដល់ការអភិវឌ្ឍធនធានទឹកប្រកបដោយនិរន្តរភាពផងដែរ។ ប្រទេសជាច្រើនក្នុងពិភពលោកបានបង្កើតរចនាសម្ព័ន្ធជណ្ដើរត្រី ហើយបង្ហាញថាវាអាចទៅរួចក្នុងការផលិតអាហារ ទឹក និងថាមពល ប៉ុន្តែលុះត្រាតែមានការរចនាតាមរបៀបដែលល្អបំផុត។ គួរកត់សម្គាល់ថា ការរចនាជណ្ដើរត្រីមួយគឺផ្អែកលើទិន្នន័យអំពីប្រភេទសត្វក្នុងទន្លេមេគង្គ។ ប្រទេសកម្ពុជាកំពុងអភិវឌ្ឍធនធានទឹកយ៉ាងឆាប់រហ័សក្នុងគោលបំណងជាច្រើន។ ដូច្នេះ ការសិក្សាលើជណ្ដើរត្រីសម្រាប់ប្រើប្រាស់ក្នុងប្រទេសកម្ពុជាគឺចាំបាច់ជាពិសេសសម្រាប់រួមបញ្ចូលលទ្ធផលជណ្ដើរត្រីជាមួយប្រព័ន្ធធារាសាស្ត្រ និងគោលនយោបាយអភិវឌ្ឍ។

ឯកឧត្តម រដ្ឋលេខាធិការ បានបន្តថាការសិក្សាជណ្ដើរត្រីត្រូវបានធ្វើឡើងនៅជណ្ដើរត្រីស្លែង ស្ថិតក្នុងស្ទឹងផ្លាំង ខេត្តសៀមរាប កាលពីឆ្នាំ២០២៣។ រដ្ឋបាលជលផល ដោយមានការគាំទ្រផ្នែកបច្ចេកទេសពី ក្រុមការងារជណ្ដើរត្រីមកពីប្រទេសអូស្រ្តាលី និងសាកលវិទ្យាល័យ Charles Sturt ជាមួយនឹងការផ្តល់មូលនិធិពីរដ្ឋាភិបាលអូស្ត្រាលី គំនិតផ្តួចផ្តើមធ្វើផ្លូវចរាចរណ៍ត្រីទន្លេមេគង្គក្រោម។ គំនិតផ្តួចផ្តើមនេះមានកិច្ចសហការល្អជាមួយ MRCs និងភ្នាក់ងារបណ្តាញ។ បញ្ជីសារពើភណ្ឌ និងការកំណត់អាទិភាពត្រូវបានធ្វើឡើងនៅឆ្នាំ២០២៣ នៅស្ទឹងផ្លាំង ដែលចងក្រងជាឯកសារទំនប់ស្ទាក់ទឹកចំនួន ៦៣កន្លែង ដែលក្នុងនោះ ២០ភាគរយតម្រូវឱ្យមានការសាងសង់ជណ្ដើរត្រី ដើម្បីស្ដារការធ្វើបន្លាសទី និងផលិតកម្មត្រីឡើងវិញ។ ជណ្ដើរត្រីមួយចំនួនត្រូវបានសាងសង់ដោយគ្មានមូលនិធិសម្រាប់ស្រាវជ្រាវ និងការត្រួតពិនិត្យដើម្បីវាយតម្លៃប្រសិទ្ធភាពនៃកការសាងសង់នៅក្នុងតំបន់។យើងក៏បានដឹងពីកិច្ចសហការល្អសម្រាប់ការធ្វើជណ្ដើរត្រីបង្ហាញ និងការស្រាវជ្រាវការបន្លាស់ទីរបស់ត្រី។ គោលបំណងនៃគម្រោងបច្ចេកវិទ្យាជណ្ដើរត្រីនេះ គឺដើម្បីសិក្សានិងចែករំលែកបទពិសោធន៍ ការចូលរួមជាមួយអ្នកពាក់ព័ន្ធសំខាន់ៗពីវិស្វករធារាសាស្ត្រ ក្រុមជលផល និងម្ចាស់ជំនួយ ដើម្បីធ្វើការដោយសកម្មសម្រាប់ពេលបច្ចុប្បន្ននិងអនាគត។

ជាមួយគ្នានេះដែរ រដ្ឋាភិបាលកម្ពុជារីករាយក្នុងការពិចារណាលើគោលនយោបាយវិជ្ជមានណាមួយដែលផ្តល់អត្ថប្រយោជន៍ដល់អ្នកនេសាទ និងប្រព័ន្ធធារាសាស្រ្ត ប៉ុន្តែចាំបាច់ត្រូវផ្អែកលើវិទ្យាសាស្ត្ររឹងមាំ បង្ហាញឱ្យឃើញច្បាស់ និងលទ្ធភាពសេដ្ឋកិច្ចដើម្បីទទួលបានដំណោះស្រាយឈ្នះ និងឈ្នះសម្រាប់ផលិតភាពជលផល និងស្រូវ។សកម្មភាពអនុវត្តការបន្លាស់ទីរបស់ត្រីនៅលើដីរបស់ FishTech នឹងធ្វើឡើងក្នុងភាពជាដៃគូជាមួយភ្នាក់ងារខ្សែបន្ទាត់ និងធនាគារអភិវឌ្ឍន៍ ដើម្បីសម្រេចបាននូវជីវភាពរស់នៅដ៏សំខាន់ ភាពធន់នឹងអាកាសធាតុ និងលទ្ធផលសន្តិសុខស្បៀងនៅទូទាំងអាស៊ីអាគ្នេយ៍។