កាលពីរសៀល ថ្ងៃទី៣ ខែមិថុនា ឆ្នាំ២០២០ នៅមណ្ឌលចត្តាឡីស័ក ស្រុកក្រឡាញ់ នៃវិទ្យាល័យក្រឡាញ់ លោក នាក់ ណេរ៉ុន អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្ត បានទទួលប្រតិភូ លោកស្រី គ្រីស្ទី ផាកូ ប្រធានបេសកម្មអង្គការអន្តរជាតិទេសន្តប្រវេសន៍កម្ពុជា (IOM) លោក ដានីញែល អាលេមូ ប្រធាន UNFPA ប្រចាំកម្ពុជា លោកស្រី Francesca Erdelmann ប្រធានកម្មវិធីស្បៀងអាហារពិភពលោកប្រចាំ ប្រទេសកម្ពុជា និងលោកឧត្តមសេនីយ៍ត្រី សេក ស៊ីវ៉េត ប្រធាននាយកដ្ឋានគាំទ្រជនរងគ្រោះ ចុះពិនិត្យការងារចត្តាឡីស័កបងប្អូនប្រជាពលរដ្ឋវិលត្រឡប់មកពីក្រៅប្រទេស។ជាមួយគ្នា អង្គការ IOM និងក្រុមការងារ UN បានប្រគល់នូវសម្ភារជូនបងប្អូនប្រជាពលរដ្ឋចំនួន៣៥នាក់ ដែលរួមមាន ថ្នាំដុសធ្មេញ ច្រាស់ដុសធ្មេញ សាប៊ូលុច្ស សាប៊ូកក់សក់Clear សាប៊ូបោកខោអាវ Lix Lemon កន្ទេល មុង ភួយ ខ្នើយ អាវយឺត ខោខ្លី កន្សែងពោះគោ និងស្បែកជើងផ្ទាត់។ការចុះពិនិត្យនេះ ក្នុងគោលបំណងពិនិត្យលទ្ធភាពក្នុងការជួយដល់បងប្អូនប្រជាពលរដ្ឋដែលបានធ្វើចំណាក ចំណូលស្រុកដោយស្របច្បាប់ និងគ្មានហានិភ័យ ការធ្វើចត្តាឡីស័កបង្ការការរីកដាលជំងឺកូវីដ១៩ និងការគាំទ្រដ៏ទៃទៀតផងដែរ៕