នៅរសៀលថ្ងៃទី១៦ ខែតុលា ឆ្នាំ២០២០ លោក ស៊ីន ចាន់ថុល ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកពួក និងព្រះតេជគុណ ម៉ក់ ប៉ឹង អនុប្រធានកិត្តិយសនៃអនុសាខាកាកសាខាកាកបាទក្រហមកម្ពុជា ស្រុកពួក និងសហការី ដោយមានការអញ្ជើញចូលរួមពីសហភាពសហព័ន្ធយុវជនស្រុកពួក និងសប្បុរសជន បាននាំយកអំណោយមនុស្សធម៌ជូនដល់គ្រួសារជួបគ្រោះមហន្តរាយដោយភ្លើងឆេះផ្ទះ នៅភូមិអំពិលពាម ឃុំខ្នាត ស្រុកពួក កាលពីរសៀលថ្ងៃទី០៨ ខែតុលា ឆ្នាំ២០២០។ក្នុងឱកាសនោះ លោកប្រធានគណៈកម្មាធិការអនុសាខាបានពាំនាំនូវការផ្តាំផ្ញើសួរសុខទុក្ខពីឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល” ។ លោក ក៏បានរំលឹកដល់បងប្អូនទាំងអស់គ្នាបង្កើនការប្រុងប្រយ័ត្នក្នុងអំឡុងពេលដែលប្រទេសកម្ពុជាយើងកំពុងទទួលរងឥទ្ធិពលព្យុះ ដែលបង្កជាបាតុភូតភ្លៀងផ្គរ រន្ទៈ ខ្យល់កន្រ្តាក់ និងជំនន់ទឹកភ្លៀង ដូច្នេះ សូមបងប្អូនប្រជាពលរដ្ឋថែរក្សាសុខភាព ទ្រព្យសម្បត្តិពិសេសកូនចៅតូចៗ ដើម្បីចៀសផុតពីគ្រោះភ័យផ្សេងៗ។ ជាមួយនេះ បើមានជំងឺនិងគ្រោះថ្នាក់ផ្សេងៗត្រូវប្រញាប់បញ្ជូនទៅមណ្ឌលសុខភាពដែលនៅជិតបំផុត។អំណោយមនុស្សធម៌បានផ្ដល់ជូនគ្រួសាររងគ្រោះដោយអគ្គីភ័យ ១គ្រួសារ ទទួលបាន អង្ករ ៥០គីឡូក្រោម មី ៣កេស ទឹកត្រី ៤យួរ ទឹកស៊ីអ៊ីវ ៣យួរ ប៊ីចេង ២កញ្ចប់ អំបិល ៥គីឡូក្រាម ប្រេងឆា ៥លីត្រ កន្ទេល១ មុង១ ខ្នើយ២ ភួយ១ សារ៉ុង៥ អាវយឺត៥ សាប៊ូដុសខ្លួន៥ ដុំ សម្ភារផ្ទះបាយ១ឈុត និងថវិកា ៥សែន ២ម៉ឺនរៀល ។ ជាមួយគ្នានេះដែរប្រតិភូរួមដំណើរ និងសប្បុរសជនបានឧបត្ថម្ភសម្រាប់គ្រួសាររងគ្រោះខាងលើសរុបមាន៖ -ព្រះអនុគណស្រុកពួក៖ ថវិកា ២សែនរៀល ។-លោកស្រី រស់ ចិន្តា និងលោក សន នី ភាស៊ីផ្សារពួក ៖អង្ករ ៥០គីឡូក្រាម មី ២កេស ទឹកត្រី ៣យួរ ទឹកស៊ីអ៊ីវ ៣យួរ ប៊ីចេង ២កញ្ចប់ អំបិល ៥គីឡូក្រាម ប្រេងឆា ៥លីត្រ ។-សហភាពសហព័ន្ធយុវជនស្រុកពួក ថវិកា ១សែន៤ម៉ឺនរៀល។-លោកស្រី សុខ ជីវី និងស្វាមី ព្រមទាំងបុត្រ សារ៉ុង៣ ។-លោកស្រី វុឌ្ឍី អាំងគឺ និងស្វាមី ព្រមទាំងបុត្រ ថវិកា ៥ម៉ឺនរៀល ។-លោកស្រី អ៊ិម ដានី សារ៉ុង២ ថ្នាំពេទ្យមួយចំនួន ។-លោក មឿន ឈឿត ជំទប់ទី១ ឃុំខ្នាត ថវិកា ២ម៉ឺនរៀល៕
