ថ្ងៃសុក្រ ទី៦ ខែវិច្ឆិកា ឆ្នាំ២០២០ ក្រុមប្រឹក្សាស្រុកសូទ្រនិគមបានបើកកិច្ចប្រជុំសាមញ្ញលើកទី១៨ អាណត្តិទី៣ របស់ខ្លួន ក្រោមអធិបតីភាព លោកស្រី ងិន មុំ ប្រធានក្រុមប្រឹក្សាស្រុក លោក ម៉ក់ ប្រុស អភិបាល នៃគណៈអភិបាលស្រុក សមាជិក សមាជិកាក្រុមប្រឹក្សា ដោយមានការចូលរួមគាំទ្រ និងសម្របសម្រួលដោយឯកឧត្តម លោកជំទាវ សមាជិកក្រុមប្រឹក្សាខេត្ត ព្រមទាំងលោក លោកស្រីនាយក នាយករងរដ្ឋបាលស្រុក ប្រធាន អនុប្រធានការិយាល័យ អង្គភាពចំណុះ និងជំនាញជុំវិញស្រុក កងកម្លាំងប្រដាប់អាវុធទាំងបីអង្គភាព លោកមេឃុំ និងសមាជិកក្រុមប្រឹក្សាឃុំ។កិច្ចប្រជុំខាងលើនេះមានរបៀបវារៈមួយចំនួនដូចជា៖១.ពិភាក្សា និងអនុម័តសេចក្តីព្រាងកំណត់ហេតុកិច្ចប្រជុំសាមញ្ញលើកទី១៧ ២.ពិភាក្សា និងអនុម័តសេចក្តីព្រាងរបាយការណ៍ប្រចាំខែតុលា ឆ្នាំ២០២០ របស់រដ្ឋបាលស្រុកព្រមទាំងរបៀបវារៈប្រជុំមួយចំនួនទៀត។កិច្ចនេះដែរក្រុមប្រឹក្សាស្រុក បានពិនិត្យ ពិភាក្សានិងអនុម័តលើរបៀបវារៈយ៉ាងហ្មត់ចត់ ដែលទទួលបានលទ្ធផលផ្លែផ្កា និងបានដោះស្រាយបញ្ហាប្រឈម និងសំណូមពរដែលបានលើកឡើងតាមបណ្តាឃុំ ការិយាល័យ អង្គភាពក្នុងកិច្ចប្រជុំ។ ជាមួយគ្នានោះក្រុមប្រឹក្សាស្រុក ក៏បានកៀរគរប្រភពធនធានថវិកាពីសប្បុរសជន ដើម្បីជួសជុល និងសាងសង់ដំបូលអគារសាលារៀនមត្តេយ្យធនធានចំនួន ១ខ្នងចាស់ទ្រុឌទ្រោមស្ថិតក្នុងសាលាគំរូស្រុកមិនអាចបើក ដំណើរការទទួលសិស្សរៀន បង្រៀនបាន ដោយពេលនេះបានសាងសង់ដំបូលរួចជាស្ថាពរហើយ៕
