នៅថ្ងៃទី២០ ខែមករា ឆ្នាំ២០២១ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រ្តៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អមដំណើរដោយ លោកស្រី យូ សុភា អភិបាលរងខេត្តសៀមរាប ថ្នាក់ដឹកនាំអគ្គរងនៃលេខាធិការដ្ឋាន គ.ជ.ប.ជ លោកអភិបាលស្រុក លោក លោកស្រីប្រធានអង្គការ IOM អង្គការWHO អង្គការUNICEF អង្គការUNFPA ប្រចាំប្រទេសកម្ពុជា មន្ត្រីសាលាខេត្ត មន្ត្រីមកពីមន្ទីរពាក់ព័ន្ធ និងអាជ្ញាធរមូលដ្ឋាន បានចុះតាមដាន ត្រួតពិនិត្យការអនុវត្តគម្រោងរួមគ្នា រវាងរាជរដ្ឋាភិបាលកម្ពុជាជាមួយអង្គការសហប្រជាជាតិ សម្រាប់គាំទ្រ និងលើកកម្ពស់ជីវភាព និងសុខភាព សម្រាប់ប្រជាពលតដ្ឋទេសន្តរប្រវេសន៍ ក្នុងដំណាក់កាលជំងឺកូវីដ-១៩ នៅឃុំចាន់ស និងឃុំខ្នារពោធិ៍ ស្រុកសូទ្រនិគម ខេត្តសៀមរាប។
នៅក្នុងដំណើរទស្សនកិច្ចនេះ ប្រតិភូបានចុះពិនិត្យ និងជួបសំណេះសំណាលជាមួយ គ្រួសារពលករ ថ្នាក់ដឹកនាំរដ្ឋបាលស្រុក ឃុំ មន្រ្តីអនុវត្តគម្រោង និងក្រុមគោលដៅដែលទទួលផលពីគម្រោង ដើម្បីសិក្សាស្វែងយល់ ពីលទ្ធផល នៃការអនុវត្តផែនការ និងបញ្ហាប្រឈមនានាដែលអាជ្ញាធរមូលដ្ឋាន និងប្រជាពលរដ្ឋដែលជាទេសន្តរប្រវេសន៍ ជួបប្រទះ ព្រមទាំងទទួលយកនៅសំណូមពរ ដែលមន្រ្តីអ្នកអនុវត្ត និងប្រជាពលរដ្ឋលើកឡើង ។ ប្រតិភូបានធ្វើទស្សនកិច្ចតាមផ្ទះគ្រួសារពលករ គ្រួសារលក់ទឹកអំពៅ ០១គ្រួសារ សួនបន្លែដំណាំកសិកម្ម កសិដ្ឋានចិញ្ចឹមមាន់ខ្នាតតូច គ្រួសារកាត់សក់ ដែលបានទទួលការឧបត្ថម្ភដោយអង្គការសហប្រជាជាតិ សហការជាមួយរាជរដ្ឋាភិបាលកម្ពុជា អនុវត្តដោយរដ្ឋបាលខេត្ត ជាមួយមន្ទីរកិច្ចការនារី មន្ទីរការងារ និងបណ្ដុះបណ្ដាលវិជ្ជាេជីវៈ និងមន្ទីកសិកម្ម រុក្ខាប្រមាញ់ និងនេសាទ គាំទ្រដោយអង្គការ IOM ក្នុងចំណោមអ្នកទទួលផលពីគម្រោងសរុប ចំនួន ៤៨គ្រួសារ (ចិញ្ចឹមមាន់ និងដាំបន្លែ ៣២គ្រួសារ លក់ទឹកអំពៅ ២គ្រួសារ កាត់សក់ ២គ្រួសារ ដំណាប់អំពិល ២គ្រួសារ បបរគ្រឿង ២គ្រួសារ លក់ទឹកសណ្ដែក ២គ្រួសារ នំគ្រក់ ២គ្រួសារ និងនំបាញ់ចានឿក ២គ្រួសារ) នៅឃុំខ្នារពោធិ៍ និងឃុំចាន់ស ស្រុកសូទ្រនិគម។
ក្នុងដំណើរទស្សនកិច្ចខាងលើនេះ លោកជំទាវប្រធានប្រតិភូ បានធ្វើការក្រើនរំលឹក ឲ្យអាជ្ញាធរដែនដីត្រូវតាមដាន និងយកចិត្តទុកដាក់ពីបញ្ហាសំណូមពរនានា ដែលប្រជាពលរដ្ឋបានស្នើ និងបានលើកទឹកចិត្តឲ្យប្រជាពលករទាំងអស់គ្នាត្រូវបង្កើនការផលិតផ្នែកកសិកម្ម ចិញ្ចឹមសត្វអាជីវកម្មផ្សេងៗ ដើម្បីដោះស្រាយបញ្ហាជីវភាព ពិសេសនៅក្នុងដំណាក់កាលដែលប្រទេសកំពុងតែកើតមានជំងឺកូវីដ១៩ ។
លោកជំទាវបានជម្រាបជូនផងដែរថា រាជរដ្ឋាភិបាល បានយកចិត្តទុកដាក់លេីបញ្ហាសុខភាព និងមុខរបរចិញ្ចឹមជីវិតរបស់បងប្អូនប្រជាពលករ ប្រជាពលរដ្ឋទូទៅ និងបានធ្វើការស្វះស្វែងគៀងគររកជំនួយឧបត្ថម្ភបន្ថែមទៀត សម្រាប់ទ្រទ្រង់ដល់ផែនការអភិវឌ្ឍការងារ និងជំនាញបច្ចេកទេសផ្សេងៗ ទៅដល់បងប្អូនប្រជាពលរដ្ឋ ដែលជាផ្នែកដ៏សំខាន់ និងជាតម្រូវការចាំបាច់ចំពោះមុខ ក្នុងការទប់ស្កាត់ការវិលត្រឡប់ទៅស្វែងរកការងារធ្វើនៅក្រៅប្រទេសដោយខុសច្បាប់ និងនៅក្នុងដំណាក់ជំងឺកូវីដ១៩នេះ។ បន្ថែមពីនោះ លោកជំទាវបានជំរុញឱ្យប្រជាពលរដ្ឋ ពិសេសប្រជាពលរដ្ឋចំណូលស្រុក ដែលទើបត្រឡប់មកវិញ ទៅចុះឈ្មោះរកការងារធ្វើនៅមន្ទីរការងារ និងបណ្តុះបណ្តាលវិជ្ជាជីវៈខេត្ត (មជ្ឈមណ្ឌលការងារខេត្តសៀមរាប) ដែលជាយន្តការរបស់រាជរដ្ឋភិបាលកម្ពុជាក្នុងការដោះស្រាយបញ្ហាចំពោះមុខរបស់ប្រជាពលរដ្ឋ ដែលមានតម្រូវការការងារ សម្រាប់ផ្គត់ផ្គងជីវៈភាពគ្រួសារប្រចាំថ្ងៃ៕