នាព្រឹកថ្ងៃសុក្រ ៤កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែតុលា ឆ្នាំ២០២២ នៅសណ្ឋាគារ អេមព្រីស អង្គរ (Empress Angkor Hotel) អគ្គនាយកដ្ឋានពន្ធដារបានបើកសិក្ខាសាលាផ្សព្វផ្សាយស្តីពី “ពន្ធលើប្រាក់បៀវត្ស ការដោះស្រាយបណ្តឹងតវ៉ាពន្ធដារ និងការអនុវត្តកិច្ចព្រមព្រៀងស្តីពីការចៀសវាងការយកពន្ធត្រួតគ្នា (Double Taxation Agreement-DTA)” ក្រោមអធិបតីភាពរបស់ ឯកឧត្តម រ័ត្ន មុនី អគ្គនាយករងនៃអគ្គនាយកដ្ឋានពន្ធដារ តំណាងដ៏ខ្ពង់ខ្ពស់ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ និងលោក សុខ ថុល អភិបាលរងនៃគណៈអភិបាលខេត្តសៀមរាប តំណាងឯកឧត្តម ទៀ សីហា អភិបាលនៃគណៈអភិបាលខេត្ត ព្រមទាំងមានការចូលរួមពីថ្នាក់ដឹកនាំនិងមន្ត្រីពាក់ព័ន្ធនៃរដ្ឋបាលខេត្តសៀមរាប ថ្នាក់ដឹកនាំនិងមន្ត្រីជំនាញនៃអគ្គនាយកដ្ឋានពន្ធដារ និងផ្នែកឯកជន តំណាងដោយសហគ្រាសផ្សេងទៀត ចំនួនប្រមាណ ៤០០ នាក់។សិក្ខាសាលានេះ​ គឺរៀបចំដើម្បីពង្រឹងការអនុវត្តកម្មវិធីកែទម្រង់ គោលដៅបញ្ច្រាបវប្បធម៌នៃការបង់ពន្ធ ឱ្យកាន់តែមានប្រសិទ្ធភាព និង ស័ក្តិសិទ្ធិភាពខ្ពស់បន្ថែមទៀត ព្រមទាំងការអនុវត្តច្បាប់ និងលិខិតបទដ្ឋានគតិយុត្តិពាក់ព័ន្ធនឹងពន្ធដារ សំដៅពង្រឹង អនុលោមភាពសារពើពន្ធ និងលើកកម្ពស់វប្បធម៌បង់ពន្ធ។