ព្រឹកថ្ងៃទី២១ ខែតុលា ឆ្នាំ២០២៤ នៅសាលប្រជុំរដ្ឋបាលខេត្ត មានកិច្ចប្រជុំសម្របសម្រួល ស្តីពីការអនុវត្តផែនការកិច្ចការពារកុមារខេត្ត ប្រចាំត្រីមាសទី៣ ឆ្នាំ២០២៤ ដែលដឹកនាំដោយ លោកជំទាវ ស៊ិន ណម សមាជិកក្រុមប្រឹក្សាខេត្ត ដោយមានការចូលរួមពីលោកស្រី ម៉ននី រង្សី អភិបាលរងខេត្ត នាយករងរដ្ឋបាល លោក លោកស្រី អភិបាល អភិបាលរងក្រុង ស្រុក មន្ទីរ-អង្គភាពពាក់ព័ន្ធ និងក្រុមការងារមន្ត្រីមួយចំនយនផងដែរ។
កិច្ចប្រជុំនេះមានគោលបំណង ពិនិត្យមើលលទ្ធផលនៃការអនុវត្តផែនការកិច្ចការពារកុមារខេត្តរួមមាន ការផ្តល់សេវាកិច្ចការពារកុមារ ការគ្រប់គ្រង ករណីការធ្វើសមាហរណកម្ម ការគាំទ្រដល់សមត្ថភាពដល់មន្ត្រីក្រុង ស្រុក ការទប់ស្កាត់ការបែកចេញពីគ្រួសារ ការទប់ស្កាត់ និងឆ្លើយតបទៅលើអំពើហិង្សាបីប្រភេទ (ផ្លូវកាយ ផ្លូវចិត្ត និងផ្លូវភេទ) និងពិនិត្យមើលកុមារងាយរងគ្រោះដោយអំពើហិង្សានានា និងកុមារដែលបានសមាហរណកម្មទៅរស់នៅក្នុងគ្រួសារ តាម សង្កាត់ ឃុំ និង ក្រុង ស្រុកនីមួយៗ ដែលកំពុងត្រូវការគាំទ្រសេវាកិច្ចការពារកុមារ សេវាសង្គម ពីឃុំ/សង្កាត់ នៃរដ្ឋបាលក្រុង ស្រុក និងអង្គការដៃគូនានា៕
