កាលពីព្រឹកថ្ងៃសុក្រ ៧រោច ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី ១២ ខែ មិថុនា ឆ្នាំ ២០២០ នៅសាលប្រជុំធំរបស់សាលាខេត្តសៀមរាប បានរៀបចំ កិច្ចប្រជុំផ្សព្វផ្សាយ និងដាក់ឲ្យដំណើរការមន្ទីរសុខាភិបាល នៃរដ្ឋបាលខេត្តសៀមរាប ស្របតាមការណែនាំរបស់ក្រសួងមហាផ្ទៃ ក្រោមអធបតីភាព លោក នាក់ ណេរ៉ុន អភិបាលរងខេត្ត និងតំណាងដ៏ខ្ពង់ខ្ពស់ ឯឧត្តម ទៀ សីហា អភិបាល នៃគណៈអភិបាលខេត្តសៀរាប និងមានការអញ្ជើញចូលរួមពី លោកប្រធានមន្ទីរសុខាភិបាល លោក នាយករងរដ្ឋបាលសាលាខេត្ត លោក លោកស្រីថ្នាក់ដឹកនាំមន្ទី-អង្គភាពជុំវិញខេត្ត លោក លោកស្រីថ្នាក់ដឹកនាំរដ្ឋបាលក្រុង ស្រុក មន្រ្តីរាជការ និងអង្គការសង្គមស៊ីវិលដែលមានសមាសភាពសរុប១០០នាក់។ឆ្លៀតក្នុងឱកាស នោះដែរ លោកអភិបាលរង ក៏បានបញ្ជាក់ពីគោលបំណងនៃការផ្សព្វផ្សាយ និងដាក់ឱ្យដំណើរការមន្ទីរសុខាភិបាល នៃរដ្ឋបាលខេត្តសៀមរាប ជាពិសេសគឺការផ្តោតសំខាន់ លើគោលការណ៍ណែនាំ ពាក់ព័ន្ធនឹងការអនុវត្តតួនាទី ភារកិច្ច ការគ្រប់គ្រង ចាត់ចែង និងការផ្តល់សេវាសុខាភិបាលជូនប្រជាពលរដ្ឋក្នុងដែនសមត្ថកិច្ចរបស់ខ្លួន ប្រកបដោយការទទួលខុសត្រូវ មានប្រសិទ្ធភាព តម្លាភាព និងគណនេយ្យភាព ស្របតាមគោលការណ៍បែបបទ និងនីតិវិធីថ្មីៗ ដូចបានកំណត់ក្នុងលិខិតបទដ្ឋានគតិយុត្តពាក់ព័ន្ធ នឹងការផ្ទេរមុខងារក្នុងវិស័យសុខាភិបាលឱ្យទៅរដ្ឋបាលរាជធានី ខេត្ត ជូនដល់ថ្នាក់ដឹកនាំខេត្ត លោក លោកស្រីប្រធានមន្ទីរ អង្គភាពជំនាញនានា និងរដ្ឋបាលក្រុង ស្រុក ឲ្យបានយល់អំពីចរន្តការងារ បែបបទ និងនីតិវិធីមួយចំនួននៅក្នុងការអនុវត្តការងាររបស់មន្ទីរសុខាភិបាលខេត្ត ដែលត្រូវបានដាក់ឱ្យដំណើរការទៅក្នុងរចនាសម្ព័ន្ធគ្រប់គ្រងថ្មីនាពេលនេះ។ លោកក៏បានបញ្ខាក់បន្ថែមទៀតថា នេះគឺជាការដាក់ឱ្យដំណើរការអនុវត្តនូវរចនាសម្ព័ន្ធ និងការគ្រប់គ្រងលើការផ្តល់សេវាសារណៈដ៏សំខាន់មួយតាមគោលការណ៍វិមជ្ឈការ និងវិសហមជ្ឈការ ពោលគឺការផ្ទេរសិទ្ធិអំណាច និងការទទួលខុសត្រូវពីក្រសួងសុខាភិបាលមកឱ្យរដ្ឋបាលខេត្ត ក្នុងការគ្រប់គ្រង ចាត់ចែង កិច្ចប្រតិបត្តិការនានាពាក់ព័ន្ធនឹងការផ្តល់សេវាសុខាភិបាលក្នុងដែនសមត្ថកិច្ចរបស់ខេត្ត។បន្ទាប់ពីការថ្លែងសុន្ទរកថារបស់លោកអភិបាលរងខេត្តរួច លោក ស្មៀន ប៊ុនធឿន នាយករងរដ្ឋបាលសាលាខេត្ត និងលោកប្រធានមន្ទីរសុខាភិបាល បានឡើងធ្វើបទបង្ហាញ ពីការប្រកាសរន្តរក្រសួងស្តីពីការរៀបចំ និងការព្រឹត្តទៅរបស់មន្ទីសុខាភិបាលនៃរដ្ឋបាលរាជធានី ខេត្ត និងបទបង្ហាញពីការប្រកាសរន្តរក្រសួងស្តីពីលក្ខខណ្ឌហិរញ្ញវត្ថុ លក្ខខណ្ឌ បច្ចេកទេសនិងនីតិវិធីហិរញ្ញវត្ថុសម្រាប់ការផ្ទេរធនធានហិរញ្ញវត្ថុទៅឲ្យរដ្ឋបាលរាជធានី ខេត្តសម្រាប់អនុវត្តមុខងារគ្រប់គ្រង និងផ្តល់សេវាសុខាភិបាល។
