ជាក់ស្តែងនៅព្រឹកថ្ងៃទី១៥ ខែមិថុនា ឆ្នាំ២០២០នេះ ក្រុមការងារនៃមន្ទីរសាធារណការ និងដឹកជញ្ជូន បានចុះបូមលូនៅក្រោយព្រះអង្គចេកព្រះអង្គចម ដើម្បីអោយទឹកស្រកបានកាន់តែលឿន។សូមបញ្ជាក់ថា កាលពីយប់ថ្ងៃទី១៤ ខែមិថុនា ឆ្នាំ២០២០ ឯកឧត្តម ទៀ សីហា អភិបាល នៃគណៈអភិបាលខេត្ត បានដឹកនាំមន្ត្រីចុះពិនិត្យស្ថានភាពទឹកភ្លៀងក្នុងក្រុងសៀមរាប តាមតំបន់ដែលមានការស្រកយឺត។ ទោះបីទឹកបានស្រកអស់ ឬនៅសល់កន្លែងខ្លះតិចតួចក៏ដោយ ឯកឧត្តម អភិបាលខេត្ត ណែនាំមន្ទីរសាធារណការនិងដឹកជញ្ជូន និងមន្ទីរពាក់ព័ន្ធចុះបូមលូ ស្តារប្រឡាយនៅក្នុងក្រុង និងការបើកមុខទឹក ដើម្បីយកកាកសំណល់ចេញពីក្នុងលូ ប្រឡាយដើម្បីរំដោះ និងបន្ថែមល្បឿនទឹកហូរឱ្យទាន់ពេល ជៀសវាងមានការលិចផ្លូវ និងភូមិដ្ឋាន ដែលធ្វើឱ្យបាត់បង់សោភ័ណភាព និងខូចផ្លូវជាដើម។
