រសៀលថ្ងៃពុធ ១០រោច ខែអាសាឍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី ១៥ ខែកក្កដា ឆ្នាំ២០២០ រដ្ឋបាលស្រុកជីក្រែង បានរៀបចំកិច្ចប្រជុំស្ដីពីការចាត់វិធានការទប់ស្កាត់ និងបង្រ្កាប ការកាប់រាន ដុត ឈូសឆាយ ទន្រ្ទានហ៊ុមព័ទ្ធ ដីព្រៃសហគមន៍ព្រៃឈើ ដីតំបន់ព្រៃលិចទឹក ដីតំបន់ការពារធនធានធម្មជាតិ ឬដីតំបន់ការពារ អភិរក្ស ក្នុងភូមិសាស្រ្តស្រុកជីក្រែង នៅសាលប្រជុំសាលាស្រុកជីក្រែង ខេត្តសៀមរាប ក្រោមអធិបតីភាពដ៏ខ្ពង់ខ្ពស់របស់ ឯកឧត្ដម ពៅ ពិសិដ្ឋ អភិបាលរង នៃគណៈអភិបាលខេត្តសៀមរាប និងជាប្រធានក្រុមការងារទទួលបន្ទុកចុះស្រុកជីក្រែង និងស្រុកស្វាយលើ។ ក្នុងកិច្ចប្រជុំនេះដែរក៏មានការអញ្ជើញចូលរួមពី លោក ស្មៀន ប៊ុនធឿន នាយករងរដ្ឋបាលសាលាខេត្ត លោក ពៅ ប៊ុនធឿន អភិបាល នៃគណៈអភិបាលស្រុកជីក្រែង លោកនាយកទីចាត់ការអន្តរវិស័យ នាយកទីចាត់ការផែនការ និងវិនិយោគ លោកមេបញ្ជាការកងកម្លាំងទាំង៣ប្រភេទ លោក ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោក អនុប្រធានបរិស្ថានខេត្ត លោកអនុប្រធានមន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចខេត្ត លោកអនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត តំណាងមន្ទីររ៉ែ និងថាមពលខេត្ត លោក លោកស្រី អភិបាលរង នៃគណៈអភិបាលស្រុកជីក្រែង លោកនាយករដ្ឋបាលស្រុក ប្រធាន អនុប្រធាន ការិយាល័យ អង្គភាពចំណុះស្រុកទាំង១៣ នាយសង្កាត់ និងនាយខណ្ឌរដ្ឋបាលព្រៃឈើជីក្រែង និងខ្វាវ សង្កាត់រដ្ឋបាលជលផលកំពង់ក្ដី និងអន្លង់សំណរ លោក លោកស្រី មេឃុំ និងមេភូមិ មន្រ្តីរាជការ និងពាក់ព័ន្ធសរុបចំនួន ១០៥ នាក់ ស្រី ០៥នាក់។ក្នុងកិច្ចប្រជុំនេះមានរបៀបវារៈ ១. មតិបើកអង្គប្រជុំរបស់ ឯកឧត្ដម ពៅ ពិសិដ្ឋ អភិបាលរង នៃគណៈអភិបាលខេត្តសៀមរាប២. អានរបាយការណ៍សង្ខេបរបស់រដ្ឋបាលស្រុកជីក្រែង ដោយ លោក ពៅ ប៊ុនធឿន អភិបាល នៃគណៈអភិបាលស្រុកជីក្រែង៣. មតិចូលរួមពីសមាជិក សមាជិកា នៃអង្គប្រជុំ៤. មតិបូកសរុប និងបិទអង្គប្រជុំដោយ ឯកឧត្ដម ប្រធានអង្គប្រជុំ។ដោយយោងតាមអនុសាសន៍ណែនាំរបស់ប្រមុខរាជរដ្ឋាភិបាលកម្ពុជា ក្នុងកិច្ចប្រជុំគណៈរដ្ឋមន្រ្តី កាលពីថ្ងៃទី០៣ ខែកក្កដា ឆ្នាំ២០២០ កន្លងមក ហើយកិច្ចប្រជុំក្នុងថ្ងៃនេះ ផ្ដោតសំខាន់ទៅលើពីរចំណុចគឺ៖១. អាជ្ញាធរភូមិ ឃុំ ស្រុក ត្រូវបន្តតាមដាន និងហាមឃាត់ដាច់ខាតកុំឲ្យមានការចូលកាប់ទន្រ្ទានដីព្រៃគ្រប់ប្រភេទរបស់រដ្ឋបន្តទៀត។២. អាជ្ញាធរភូមិ ឃុំ ត្រូវស្រង់ទិន្នន័យអាស្រ័យផលយូរឆ្នាំរបស់ប្រជាពលរដ្ឋ។