ថ្ងៃចន្ទ ៦រោច ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១០ ខែសីហា ឆ្នាំ២០២០ នៅបរិវេណវត្តចេកក្អូវឃុំស្រែខ្វាវ ស្រុកអង្គរជុំ និងបរិវេណវត្តប្រាសាទ ឃុំជប់តាត្រាវ ស្រុកអង្គរធំ មានពិធីសំណេះសំណាលសួរសុខទុក្ខ និងផ្តល់អំណោយជូនដល់ប្រជាពលរដ្ឋរងគ្រោះដោយសារគ្រោះធម្មជាតិ គ្រោះមហន្តរាយផ្សេងៗ និងចាស់ជរាគ្មានទីពឹង ដឹកនាំដោយ លោកស្រី យូ សុភា អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និង ឯកឧត្ដម លោកជំទាវ សមាជិក សមាជិកា ក្រុមប្រឹក្សាខេត្ត ចុះជួយមូលដ្ឋានស្រុកអង្គរជុំ លោកប្រធាន អនុប្រធានមន្ទីរ អង្គភាពពាក់ព័ន្ធ អាជ្ញាធរមូលដ្ឋាន និងបងប្អូនប្រជាពលរដ្ឋរងគ្រោះ ដោយសារគ្រោះធម្មជាតិ ចាស់ជរាគ្មានទីពឹង និងជនងាយរងគ្រោះជាច្រេីននាក់។ ពិធីជួបសំណេះសំណាលសួរសុខទុក្ខ និងផ្តល់អំណោយ ជូនដល់លោកយាយ លោកតា និងបងប្អូន ប្រជាពលរដ្ឋរងគ្រោះដោយសារគ្រោះធម្មជាតិ និងគ្រោះមហន្តរាយផ្សេងៗ ក៏ដូចជាចាស់ជរាក្រីគ្មានទីពឹង ជាអំណោយដ៏ថ្លៃថ្លារបស់រាជរដ្ឋាភិបាល តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា ហើយដែលបាន និងកំពុងរៀបចំឡើងដោយមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត។ ការផ្ដល់អំណោយជូនដល់ពួកគាត់នាពេលនេះ គឺជាការចែករំលែកដល់ពួកគាត់ ដេីម្បីជួយសម្រាលការលំបាក និងការជួយគ្នាក្នុងគ្រាមានអាសន្នអន់ក្រ ហើយក៏ជាប្រពៃណី ដែលថ្នាក់ដឹកនាំគ្រប់លំដាប់ថ្នាក់ តែងតែប្រតិបត្តិជាប់ជាប្រចាំគ្រប់កាលៈទេសៈ ដោយមិនប្រកាន់ពណ៌សម្បុរ ជាតិសាសន៍ និងគណបក្សនយោបាយណាមួយឡើយ។អំណោយដែលបានផ្ដល់ជូនពេលនេះ គឺជាគ្រឿងឧបភោគបរិភោគ ជូនដល់ លោកយាយលោកតា បងប្អូនប្រជាពលរដ្ឋជួបការលំបាកដោយសារគ្រោះធម្មជាតិ និងគ្រោះមហន្តរាយផ្សេងៗ ក៏ដូចជាចាស់ជរា ក្រីក្រគ្មានទីពឹង ស្ថិតក្នុងភូមិសាស្រ្តស្រុកអង្គរជុំ ខេត្តសៀមរាប ចំនួន ១៧៥គ្រួសារ ដោយក្នុង ០១គ្រួសារ ទទួលបាន អង្ករ ចំនួន ២០គីឡូក្រាម មីម៉ាម៉ា ចំនួន ០១កេស ប៊ីចេង ២.៥គីឡូក្រាម ចំនួន ០១ថង់ទឹកស៊ីអុីវ និងទឹកត្រី ចំនួន ០១យួរ ត្រីខកំប៉ុង ចំនួន ០១យួរ៕
