នារសៀលថ្ងៃសុក្រ ១០រោច ខែស្រាពណ៍ ឆ្នាំជូត ទោស័ក ពស២៥៦៤ ត្រូវនឹងថ្ងៃទី១៤ ខែសីហា ឆ្នាំ២០២០ លោក ពៅ ពិសិដ្ឋ អភិបាលរងខេត្ត និងជាប្រធានក្រុមការងារត្រួតពិនិត្យវិធានសុវត្ថិភាពទេសចរណ៍ខេត្តសៀមរាប តំណាងឯកឧត្តម ទៀ សីហា អភិបាល នៃគណៈអភិបាលខេត្ត បានដឹកនាំកិច្ចប្រជ៉ំក្រុមការងារបច្ចេកទេសមន្ទីរទេសចរណ៍ខេត្ត ដើម្បីពង្រឹងការអនុវត្តកាន់តែមានប្រសិទ្ធភាពខ្ពស់ចំពោះវិធានសុវត្ថិភាពទេសចរណ៍ក្នុងកែប្រែមណ្ឌលកម្សាន្តទេសចរណ៍មនុស្សពេញវ័យ ខារ៉ាអូខេ (KTV) ទៅជាភោជនីយដ្ឋាន (បណ្តោះអាសន្ន) ក្នុងបរិបទទប់ស្កាត់ការរីក រាលដាលជំងឺកូវីដ-១៩។ ក្នុងកិច្ចប្រជុំនេះ លោក អភិបាលរងខេត្ត បានជំរុញ និងណែនាំអោយមន្ទីរទេសចរណ៍ត្រូវសហការជាមួយក្រុមការងារនៃមន្ទីរសុខាភិបាលខេត្ត និងអាជ្ញាធរពាក់ព័ន្ធ ដើម្បីចុះត្រួតពិនិត្យ ណែនាំវិធានការពារសុវត្ថិភាពសុខាភិបាល ដល់ម្ចាស់អាជីវកម្មតាមមូលដ្ឋានដែរកំពុងបើកដំណើរការ និងស្នើអោយម្ចាស់អាជីវកម្មមកដាក់ពាក្យស្នើស៉ំអាជ្ញាបណ្ណទេសចរណ៍អោយបានឆាប់រហ័ស ដើម្បីក្រុមការងារចុះត្រួតពិនិត្យ និងវាយតំលៃតាម លក្ខណៈបច្ចេកទេសថាពិតជាស្របតាមសេចក្តីណែនាំរបស់ក្រសួងសុខាភិបាលហើយឬនៅ ប្រសិនជាស្របហើយនោះយើងនឹងអនុញ្ញាតជូនដល់ពួកគាត់។ជាមួយគ្នានេះ រដ្ឋបាលខេត្តសៀមរាប សូមអំពាវនាវដល់ប្រជាពលរដ្ឋ ក៏ដូចជាដល់ម្ចាស់អាជីវកម្ម ទេសចរណ៍ទាំងអស់ត្រូវបន្តចូលរួមគ្នាក្នុងការទប់ស្កាត់ការីករាលដាលកូវីដ-19 តាមរយៈការរៀបចំបុគ្គលិកប្រចាំកាសម្រាប់វាស់កំដៅ លាងសម្អាតដៃដោយអាកុល ឬជែលអោយបានញឹកញាប់ បុគ្គលិកត្រូវពាក់ម៉ាស់ជាប្រចាំក្នុងពេលបំពេញការងារ និងការរក្សាឱ្យបានគម្លាតបុគ្គល និងគម្លាតសង្គម ដែលជាវិធានសុវត្ថិភាពសម្រាប់អាជីវកម្ម និងប្រជាពលរដ្ឋទូទៅ ជាពិសេសគឺស្របតាមការណែនាំរបស់ក្រសួងសុខាភិបាល។ កិច្ចប្រជុំនេះរៀបចំនៅរដ្ឋបាលខេត្តសៀមរាប ។