ថ្ងៃពុធ ទី២៣ ខែកញ្ញា ឆ្នាំ២០២០ លោក ម៉ក់ ប្រុស អភិបាល នៃគណៈអភិបាលស្រុកសូទ្រនិគម និងលោកស្រី ងិន មុំ ប្រធានក្រុមប្រឹក្សាស្រុក បានអញ្ជើញជាកិត្តិយស អបអរសាទរ ពិធីប្រកាសបិទផ្សាយជាសាធារណៈនូវឯកសារ នៃការវិនិច្ឆ័យប្លង់សុរិយោដី ក្នុងភូមិក្រសាទុំ ភូមិដំដែកថ្មី ភូមិស្រែធ្នង់ និងភូមិបុស្ស ឃុំដំដែក ស្រុកសូទ្រនិគម។ឯកសារវិនិច្ឆ័យរួមមានប្លង់សុរិយោដី និងបញ្ជីឈ្មោះអ្នកកាន់កាប់ដី ដែលក្រុមការងារចុះបញ្ជីដីធ្លីបានវាស់វែងកន្លងមក ហើយការបិទផ្សាយនេះមានរយៈពេល១៥ថ្ងៃ (ដោយរាប់បញ្ចូលទាំងថ្ងៃឈប់សម្រាក) គិតចាប់ពីថ្ងៃទី២៣ ខែកញ្ញា ឆ្នាំ២០២០ ដល់ថ្ងៃទី០៧ ខែតុលា ឆ្នាំ២០២០ ដើម្បីអោយបងប្អូនប្រជាពលរដ្ឋ ដែលជាម្ចាស់កម្មសិទ្ធិ ឬអ្នកពាក់ព័ន្ធ ធ្វើការពិនិត្យ ផ្ទៀងផ្ទាត់ ឈ្មោះក៏ដូចជាទិន្នន័យផ្សេងៗ ដើម្បីបញ្ជាក់ពីភាពត្រឹមត្រូវ ឬមានបញ្ហាខុសឆ្គងផ្សេងៗ អាចធ្វើការតវ៉ាបានក្នុងថេរវេលាដូចបានកំណត់ខាងលើ។ដោយមានការចូលរួមសហការពីបងប្អូនប្រជាពលរដ្ឋ ទើបក្រុមការងារសុរិយោដីខេត្ត រដ្ឋបាលស្រុកសូទ្រនិគម អាជ្ញាធរឃុំភូមិគ្រប់លំដាប់ថ្នាក់ទាំងអស់ បានខិតខំប្រឹងប្រែងការងារចុះបញ្ជីនេះបានដំណើរការយ៉ាងរលូនដូចពេលបច្ចុប្បន្ននេះ។សមិទ្ធិផលជាច្រើនរាប់មិនអស់ដែលសម្រេចបាន គឺសុទ្ធសឹងតែកើតឡើងដោយក្រុមការងារ អាជ្ញាធរគ្រប់លំដាប់ថ្នាក់ បងប្អូនប្រជាពលរដ្ឋ ជាពិសេសគឺការដឹកនាំដ៏ឈ្លាសវៃ ប្រកបដោយកិត្តិបណ្ឌិតរបស់រាជរដ្ឋាភិបាលកម្ពុជា ដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី ធ្វើអោយប្រទេសកម្ពុជាមានការអភិវឌ្ឍ និងរីកចម្រើនឥតឈប់ឈរ។